July 8, 2026
සිම්බාබ්වේ ජාතික පාපන්දු ක්රීඩක ඩිවයින් ලුංගා ජොහැනස්බර්ග් නුවරදී එල්ල වූ වෙඩි ප්රහාරයකින් දිවි ගලවා ගෙන ඇතැයි දකුණු අප්රිකානු පොලිසිය පවසයි.
එරට ජනමාධ්ය වාර්තාවලට අනුව, 31 හැවිරිදි මෙම සුපිරි පාපන්දු ක්රීඩකයා පසුගිය ඉරිදා හිල්බ්රෝ නමැති උප නගරය හරහා මෝටර් රථයකින් ගමන් කරමින් සිටියදී හඳුනා නොගත් තුවක්කුකරුවෙකු විසින් ඔහුගේ රථයට වෙඩි තබා ඇත.
සිම්බාබ්වේ ජාතික පාපන්දු කණ්ඩායම මෙන්ම දකුණු අප්රිකාවේ ප්රමුඛතම ක්රීඩා සමාජයක් වන Mamelodi Sundowns කණ්ඩායම ද නියෝජනය කරන ලුංගාට, මෙම ප්රහාරයෙන් කිසිදු හානියක් සිදුව නොමැත.
දකුණු අප්රිකාව තුළ අපරාධ රැල්ල මේ වන විට විශාල ගැටලුවක් බවට පත්ව ඇති අතර, එය ලෝකයේ ඉහළම මිනීමැරුම් අනුපාතයක් වාර්තා වන රටවලින් එකකි.
පොලිස් ප්රකාශක කැප්ටන් ටින්ට්ස්වාලෝ සිබෙකෝ සඳහන් කළේ මෙම සිදුවීම මිනීමැරීමට තැත් කිරීමේ සිද්ධියක් ලෙස විමර්ශනය කරන නමුත් මෙතෙක් කිසිදු සැකකරුවෙකු අත්අඩංගුවට ගෙන නොමැති බවයි. ඇය වැඩිදුර තොරතුරු අනාවරණය නොකළ ද, දකුණු අප්රිකානු පුවත්පතක් වන The Citizen වාර්තා කර තිබුණේ ප්රහාරයට ලක්වන අවස්ථාවේදී ලුංගා ඔහුගේ බාල සහෝදරයා සමඟ පල්ලිය බලා යමින් සිටි බවයි.
ඔවුන් දෙදෙනා හිල්බ්රෝ ප්රදේශය හරහා ගමන් කරමින් සිටියදී සැකකරු ඔවුන්ගේ මෝටර් රථයට වෙඩි තබා ඇත්තේ, ලුංගා රහස් පොලිස් නිලධාරියෙකු ලෙස වැරදියට වටහා ගැනීම නිසා බව ද එම වාර්තාවල වැඩිදුරටත් සඳහන් වේ.
