සමාජ මාධ්‍ය ඔස්සේ ප්‍රචාරය වූ දෙහිවල ප්‍රදේශයේ වයෝවෘද්ධ පුද්ගලයෙකු කොල්ලකෑමේ සිද්ධියට සම්බන්ධ සැකකරුවකු අයිස් මත්ද්‍රව්‍ය සමඟ අත්අඩංගුවට ගෙන ඇති බව පොලිසිය පවසයි.

දෙහිවල පොලිස් අපරාධ අංශයේ නිලධාරීන් විසින් ඊයේ (19) මෙම අත්අඩංගුවට ගැනීම සිදුකර ඇත.

මෙම සිද්ධිය අප්‍රේල් 17 වැනි දින දෙහිවල වෛද්‍ය පාරේදී සිදුව ඇති අතර, එහිදී 74 හැවිරිදි පුද්ගලයෙකු බිමට තල්ලු කර ඔහුගේ කමිස සාක්කුවේ තිබූ රුපියල් 2,100 ක් කොල්ලකා ඇති බව පොලිසිය පවසයි.

පහරදීමේ සීසීටීවී දර්ශන සමාජ මාධ්‍ය ඔස්සේ සංසරණය වූ අතර, අනතුරව පොලිසිය පරීක්ෂණයක් ආරම්භ කර තිබිණි.

පොලිස් මෙහෙයුමකදී සැකකරු අත්අඩංගුවට ගෙන ඇති අතර, ඔහු සතුව තිබී අයිස් මිලිග්‍රෑම් 5,200 ක් ද සොයාගෙන ඇත.

සැකකරු දෙහිවල පදිංචි 23 හැවිරිදි පුද්ගලයෙකි.

ඔහු අද(20) ගල්කිස්ස මහේස්ත්‍රාත් අධිකරණයට ඉදිරිපත් කිරීමට නියමිත අතර දෙහිවල පොලිසිය වැඩිදුර පරීක්ෂණ පවත්වයි.