පෞද්ගලික ඉන්ධන සැපයුම්කරුවන්ගේ ඉල්ලීම් ඉටුකිරීම සඳහා පාරිභෝගිකයන් පිට පීඩනය පටවමින් රජය ඉන්ධන මිල ඉහළ නොදමන බව බලශක්ති අමාත්‍ය අනුර කරුණාතිලක පවසයි.

අමාත්‍යවරයා සඳහන් කළේ, තමන්ගේ මෙහෙයුම් පාලනය වන ගිවිසුම්වලට අනුකූලව, තමන්ගේ පිරිවැය මත පදනම්ව තමන්ගේම විකිණුම් මිල ගණන් තීරණය කිරීමේ හැකියාව පෞද්ගලික ඉන්ධන සමාගම්වලට පවතින බවයි.

පෞද්ගලික සමාගම්වල අවශ්‍යතාවලට ගැලපෙන පරිදි ඉන්ධන මිල ඉහළ නංවමින් පාරිභෝගිකයන් පීඩාවට පත්කිරීමට රජය සූදානම් නැති බවද ඔහු අවධාරණය කළේය.

එමෙන්ම, පෞද්ගලික ඉන්ධන සැපයුම්කරුවන් ඉන්ධන සැපයුම සීමා කිරීම දිගටම සිදු කළහොත් රජය ඊට සුදුසු පියවර ගන්නා බවටද ඇමැති කරුණාතිලක අනතුරු ඇඟවීය.

අමාත්‍යවරයාගේ මෙම අදහස් දැක්වීම සිදුවූයේ පෞද්ගලික සමාගම්වල ඉන්ධන සැපයුම් සීමාකිරීම් සහ ඔවුන්ගේ මිල ගණන් ඉල්ලීම් සම්බන්ධයෙන් කනස්සල්ලක් පවතින පසුබිමකය.