තමන්ගේ 98 හැවිරිදි වියේ පසුවන මිත්තණිය සමඟ එක්ව කුමන්ත්‍රණය කළ බවට එල්ල වී ඇති චෝදනාවට එරෙහිව යෝෂිත රාජපක්ෂ විසින් ඉදිරිපත් කර ඇති නීතිමය අභියෝගය පිළිබඳ තීන්දුව ලබන ජූලි මස 03 වැනිදා ප්‍රකාශයට පත්කිරීමට අභියාචනාධිකරණය තීරණය කර තිබේ.

ඩේසි ෆොරස්ට් විසින් රුපියල් මිලියන 70ක දේපළ මිලදීගැනීමට අදාළව, ඇය සහ යෝෂිත රාජපක්ෂ යන දෙදෙනාට එරෙහිව 2025 පෙබරවාරි මාසයේදී කොළඹ මහාධිකරණය හමුවේ අධිචෝදනා ගොනුකෙරිණි. එහිදී චෝදනා එල්ල වුණේ මෙම දේපළ යෝෂිත රාජපක්ෂ වෙනුවෙන් මිලදී ගෙන ඇති බවටයි.

කෙසේවෙතත්, කොළඹ මහාධිකරණයේ නඩු විභාගය අතරතුරදී ඩේසි ෆොරස්ට් ඩිමෙන්ෂියා හෙවත් අමතකවීමේ රෝගයෙන් පෙළෙන බැවින් ඇයට නඩු විභාගයට පෙනීසිටීමට නොහැකි බව තහවුරු විය. ඒ අනුව ඇයව නඩු කටයුතුවලින් නිදහස් කිරීමට මහාධිකරණය පියවර ගත්තේය.

එහෙත් පසුව, යෝෂිත රාජපක්ෂ සහ ඩේසි ෆොරස්ට් යන දෙදෙනා එක්ව මෙම අපරාධය සිදු කිරීමට කුමන්ත්‍රණය කළ බවට වෙනමම අධිචෝදනාවක් යටතේ ඇයගේ නම නැවතත් ඇතුළත් කෙරිණි. යෝෂිත රාජපක්ෂ මෙයට අභියෝග කළේ, වරක් නිදහස් කළ පසු ඇයගේ නම නැවත අධිචෝදනා පත්‍රයට ඇතුළත් කළ නොහැකි බවත්, තමන්ට ‘තනිවම කුමන්ත්‍රණය කළ නොහැකි’ බවත් පවසමිනි.

මහාධිකරණය විසින් 2026 මැයි 14 වන දින මෙම විරෝධතාව ප්‍රතික්ෂේප කළ අතර, ඒ හේතුවෙන් යෝෂිත රාජපක්ෂ අභියාචනාධිකරණය හමුවේ ප්‍රතිශෝධන අයදුම්පතක් ගොනුකළේය.

පසුගිය අඟහරුවාදා (ජූනි 16) පැවැති වාද විවාදවලදී යෝෂිත රාජපක්ෂ වෙනුවෙන් පෙනීසිටි නීතිඥ හෆීල් ෆාරිස් තර්ක කළේ, මුළු චෝදනාවම ඉල්ලා අස්කර නොගෙන එක් විත්තිකරුවකු පමණක් නිදහස් කිරීමට රජයේ නීතිඥවරයාට බලයක් නොමැති බවත්, එය කළ හැක්කේ නීතිපතිවරයාට පමණක් බවත්ය. ඩේසි ෆොරස්ට් නිදහස් කිරීමෙන් පසු කුමන්ත්‍රණ චෝදනාව පවත්වාගෙන යා නොහැකි බවත්, වරදකරු වුවහොත් යෝෂිත රාජපක්ෂට වසර හතක හෝ ඊට වැඩි සිරදඬුවමකට මුහුණදීමට සිදුවන බවත් ඔහු පෙන්වාදුන්නේය.

මීට පිළිතුරු දෙමින් ජ්‍යෙෂ්ඨ නියෝජ්‍ය සොලිසිටර් ජනරාල් ජනක බණ්ඩාර කියාසිටියේ, විශේෂඥ වෛද්‍ය මණ්ඩලයක් විසින් ඇය ඩිමෙන්ෂියා රෝගියකු බව තහවුරු කිරීමෙන් පසු නීතිපතිවරයාට ඇයව නිදහස් කිරීම හැර වෙනත් විකල්පයක් නොතිබූ බවයි. කුමන්ත්‍රණ චෝදනාව ඉදිරියට ගෙනයෑමට නම් පුද්ගලයන් දෙදෙනකු සිටිය යුතු බැවින්, ඇයගේ නම නැවත ඇතුළත් කිරීම අත්‍යවශ්‍ය වූ බව ඔහු සඳහන් කළේය.

දිගුකාලීන තර්ක විතර්කවලින් අනතුරුව, ආර්. අමල් රණරාජා සහ වෛද්‍ය සුමුදු ප්‍රේමචන්ද්‍ර යන විනිසුරු මඩුල්ල නඩුවේ තීන්දුව ජූලි 3 වැනිදාට නියම කළහ.

යෝෂිත රාජපක්ෂ වෙනුවෙන් නීතිඥ හෆීල් ෆාරිස් සමඟ එන්. කේ. අශෝක්බාරන්, සංජීව කොඩිතුවක්කු, ෂැනන් තිලකරත්න සහ අශ්වින් ප්‍රගාෂ් පෙනීසිටි අතර, නීතිපතිවරයා වෙනුවෙන් නියෝජ්‍ය සොලිසිටර් ජනරාල් ජනක බණ්ඩාර සහ ඔස්වල්ඩ් පෙරේරා පෙනීසිටියහ.