2024 ලෙජන්ඩ්ස් ලීග් තරගාවලිය අතරතුර ‘කැන්ඩි සාම්ප් ආමි’ කණ්ඩායමේ කළමනාකරු ආකාෂ් (යෝගි) පටෙල්ට තරග පාවාදීමේ උත්සාහයක් සම්බන්ධයෙන් මාතලේ මහාධිකරණය විසින් වසර හතරක සිරදඬුවමක් නියම කර තිබේ.

පල්ලෙකැලේ අන්තර්ජාතික ක්‍රිකට් ක්‍රීඩාංගණයේ පැවැති 2024 ලෙජන්ඩ්ස් ලීග් තරඟාවලියේදී තරඟ පාවාදීම සඳහා ශ්‍රී ලංකාවේ ප්‍රධාන ක්‍රිකට් තේරීම් කමිටු සභාපති උපුල් තරංග හමුවීම සම්බන්ධයෙන් ඉන්දීය ජාතිකයා වරදකරු බවට පත්විය.

සිරදඬුවමට අමතරව, පටෙල්ට රුපියල් මිලියන 85 ක දඩයක් නියම කරන ලද අතර අපහාස කිරීම සඳහා වන්දි වශයෙන් උපුල් තරංගට රුපියල් මිලියන 2ක් ගෙවීමට නියෝග කරන ලදී.

සවිස්තරාත්මක පරීක්ෂණයක් සහ සාක්ෂිකරුවන්ගේ සාක්ෂිවලින් පසුව, පටෙල් නොමැතිව නඩු විභාගය සිදුවිය.

පෙර නඩු විභාගයේදී, පටෙල් අධිකරණයේ පෙනීසිටීමට අපොහොසත් වූ අතර, විමර්ශනවලින් හෙළිවූයේ ඔහු මුහුදු මාර්ගයෙන් රටින් පළාගොස් ඇති බවයි.

අධිකරණය විසින් පනවා ඇති සංචාරක තහනම නොතකා, පටෙල් රටින් පිටව ගියේ කෙසේද යන්න පිළිබඳව සම්පූර්ණ පරීක්ෂණයක් පවත්වන ලෙස විනිසුරුවරයා රහස් පොලිසියට උපදෙස් දී තිබේ.