July 28, 2026
භික්ෂූන් වහන්සේලා අපකීර්තියට පත්කිරීමට සහ උන්වහන්සේලා සමාජය තුළ සක්රීය භූමිකාවක් ඉටුකිරීම වැළැක්වීමට නොයෙකුත් උත්සාහයන් ක්රියාත්මක වන බව ශාසනාරක්ෂක සංඝ සභාවේ පාලක සභා සාමාජික, පූජ්ය අගලකඩ සිරිසුමන හිමියෝ සඳහන් කරති.
උන්වහන්සේ මේ බව පවසා සිටියේ ශාසනාරක්ෂක සංඝ සභාව විසින් කොළඹදී සංවිධානය කර තිබූ ‘සුඛා සංඝස්ස සාමග්ගී’ සංඝ සම්මේලනය අමතමිනි.
බුද්ධ ශාසනය සුරක්ෂිත කොට පෝෂණය කිරීම සඳහා වන ආණ්ඩුක්රම ව්යවස්ථාපිත වගකීම ඉටුකරන ලෙස බලධාරීන්ගෙන් ඉල්ලා සිටීම ඇතුළු කරුණු කිහිපයක් මුල් කරගනිමින් මෙම සම්මේලනය කැඳවා තිබිණි.
“මහා සංඝරත්නය එකමුතු වන සෑම අවස්ථාවකදීම කලබල වී, අපව ඉලක්ක කර ගනිමින් අපකීර්තියට පත් කිරීමේ ප්රචාරණ ව්යාපාර ආරම්භ කරන පිරිසක් මේ රටේ සිටිනවා” යනුවෙන් උන්වහන්සේ එහිදී පැවසූහ.
විදේශයන්හි සිට ක්රියාත්මක වන බලවේග සහ ඔවුන්ගේ මුල්යමය මෙන්ම මතවාදී අනුග්රහය ලබන පිරිස්, බලයේ සිටින පුද්ගලයන්ට බලපෑම් කරමින් සිටින බවත්, එම කණ්ඩායම් බෞද්ධ භික්ෂූන් වහන්සේලාට මෙන්ම රටේ සංස්කෘතික උරුමයට එරෙහිව කටයුතු කරන බවත් උන්වහන්සේ වැඩිදුරටත් චෝදනා කළහ.
“මේ තත්ත්වය මෙහෙමම පැවතුණොත්, තව අවුරුදු දෙකක් හෝ තුනක් යද්දී භික්ෂූන් වහන්සේලාට පාරේ බැහැලා යන්නවත් බැරි තත්ත්වයක් ඇති වෙන්න පුළුවන්. අපි නිශ්ශබ්දව සිටිය යුතු නැහැ. අපේ අරමුණ ආණ්ඩු පෙරළීම හෝ පාලකයන් ඉවත් කිරීම නෙවෙයි; අපට එල්ල වන අභියෝග හමුවේ එකමුතු වී අපගේ ශක්තිය පෙන්වීමයි” යනුවෙන් උන්වහන්සේ අවධාරණය කළහ.
