September 18, 2023
තවදුරටත් භාවිතයේ නොමැති රාජ්‍ය තාන්ත්‍රික වාහනවල ලියාපදිංචි අංක යටතේ සුඛෝපභෝගී වාහන ලියාපදිංචි කිරීමේ ජාවාරමකට සම්බන්ධ බව කියන නිලධාරීන්ට එරෙහිව මෝටර් රථ ප්‍රවාහන දෙපාර්තමේන්තුව පරීක්ෂණයක් ආරම්භ කර ඇති බව වාර්තා වේ.
ජාතික විගණන කාර්යාලය විසින් මෑතකදී නිකුත් කරන ලද විගණන වාර්තාවකින් හෙළිවූයේ, මෝටර් රථ ප්‍රවාහන දෙපාර්තමේන්තුවේ ඇතැම් නිලධාරීන් දීර්ඝ කාලයක් තිස්සේ ශ්‍රී ලංකාවේ රාජ්‍ය තාන්ත්‍රික නිලධාරීන්ට ලබා දී ඇති අවලංගු කරන ලද වාහන අංක භාවිත කරමින් සුඛෝපභෝගී වාහන ලියාපදිංචි කර ඇති බවත්, ඒ හේතුවෙන් රජයට මිලියන ගණනක බදු ආදායම අහිමි වී ඇති බවත්ය.
සිද්ධිය සම්බන්ධයෙන් දෙපාර්තමේන්තු මට්ටමේ පරීක්ෂණයක් ආරම්භ කරන ලෙස උපදෙස් ලබාදී ඇති නමුත්, එම විගණන වාර්තාවේ අදාළ වංචාව සම්බන්ධයෙන් කිසිදු වැඩිදුර තොරතුරක් ඇතුළත් කර නොමැති බව ආයතනයේ ඉහළ නිලධාරියෙක් සඳහන් කර තිබේ.
රාජ්‍ය තාන්ත්‍රික අවශ්‍යතා සඳහා දෙපාර්තමේන්තුව විසින් වාහන ලියාපදිංචි කර ඇත්තේ, වාහන හඳුනාගැනීමේ අංක (චැසි අංකය) සහ අනෙකුත් සුඛෝපභෝගී වාහනවල එන්ජින් අංක භාවිත කර බව එම වාර්තාවේ සඳහන් වේ.
එම රාජ්‍ය තාන්ත්‍රික වාහන ප්‍රතිඅපනයනය කිරීමේදී පසුගිය වසරවල වාහන හයක් ලියාපදිංචි කර ඇති බවත්, අනෙකුත් සුඛෝපභෝගී වාහනවල චැසි අංක සහ එන්ජින් අංක ව්‍යාජ ලෙස ඇතුළත් කර ඇති බවත් අනාවරණය වී ඇත.
වාහන 5000ක් පමණ නීතිවිරෝධී ලෙස ආනයනය කර වංචනික ක්‍රම භාවිත කරමින් ලියාපදිංචි කර ඇති බවත්, එමඟින් රටේ ආර්ථිකයට විශාල පාඩුවක් සිදු කර ඇති බවත් මෑතක දී අල්ලස් හෝ දූෂණ චෝදනා විමර්ශන කොමිෂන් සභාව විසින් සොයා ගන්නා ලදී.
