NDB බැංකුවේ සිදුව ඇති වංචනික ගනුදෙනු මගින් සිදු වූ මුළු මූල්‍ය බලපෑම රුපියල් බිලියන 13.6 දක්වා ඉහළ ගොස් ඇති අතර, ඊට අදාළ අවසාන විගණන වාර්තාව මගින් බැංකුවේ අභ්‍යන්තර පාලන පද්ධතියේ සහ යහපාලනයේ පැහැදිලි අසාර්ථකත්වයන් හා දුර්වලතා රැසක් අනාවරණය කරගෙන තිබේ.

පාර්ලිමේන්තු මන්ත්‍රී ආචාර්ය හර්ෂ ද සිල්වාගේ සභාපතිත්වයෙන් රැස්වූ පාර්ලිමේන්තුවේ රජයේ මුදල් පිළිබඳ කාරක සභාව හමුවට ශ්‍රී ලංකා මහ බැංකුවේ නිලධාරීන් කැඳවා තිබූ අතර, එහිදී මෙම මූල්‍ය අක්‍රමිකතාව සහ ඊට අදාළ අවසාන විගණන වාර්තාව සවිස්තරාත්මකව පරීක්ෂාවට ලක් කෙරිණි.

එම කාරක සභාවේදී අනාවරණය වූයේ 2016 අප්‍රේල් 01 වනදා සිට 2026 මාර්තු 31 වනදා දක්වා කාලපරිච්ඡේදය ආවරණය වන පරිදි සිදුකළ විගණනය මගින් රුපියල් 13,639,664,684 ක වංචනික ගනුදෙනු හඳුනාගෙන ඇති බවයි.

මෙම මුළු මුදල, 2026 අප්‍රේල් 06 වනදා NDB බැංකුව විසින් ආරම්භයේදී හෙළිදරව් කරන ලද රුපියල් බිලියන 13.2 ක මුදලට වඩා රුපියල් මිලියන 400 ක පමණ ඉහළ යාමකි. එමෙන්ම, අතුරු විගණන වාර්තාවක් පදනම් කරගනිමින් ජූනි 26 වනදා බැංකුව විසින් අනාවරණය කළ මුදලට වඩා මෙම අවසාන අගය රුපියල් මිලියන 60 කින් ඉහළ ගොස් ඇත.