ඉරානයට එරෙහි එක්සත් ජනපද-ඊශ්‍රායල යුද්ධය හේතුවෙන් බලශක්ති සැපයුම් සඳහා එල්ල වී ඇති පීඩනය ලිහිල් කිරීමට ට්‍රම්ප් පරිපාලනය විසින් ඊයේ (20) දින 30ක සම්බාධක සහනයක් නිකුත් කළ බව එක්සත් ජනපද භාණ්ඩාගාර ලේකම් ස්කොට් බෙසන්ට් පැවසීය.

සති දෙකක් පමණ ඇතුළත එක්සත් ජනපදය තාවකාලිකව සම්බාධක ඉවත් කළ තුන්වැනි අවස්ථාව මෙයයි.

ඇමරිකා එක්සත් ජනපදය මීට පෙර රුසියානු තෙල් සඳහා සම්බාධක ලිහිල් කර තිබිණි.

භාණ්ඩාගාර දෙපාර්තමේන්තුවේ වෙබ් අඩවියට පළ කර ඇති බලපත්‍රය අනුව නැව්වලට පටවා ඇති ඉරාන බොරතෙල් සහ ඛනිජ තෙල් නිෂ්පාදන මාර්තු 20 සිට අප්‍රේල් 19 දක්වා විකිණීමට අවසර ලැබේ.

“මෙම තාවකාලික සැපයුම් අගුළු හැරීමෙන්, එක්සත් ජනපදය ගෝලීය වෙළඳපොළට තෙල් බැරල් මිලියන 140ක් පමණ කඩිනමින් ගෙන එනු ඇත, ලොව පුරා බලශක්ති ප්‍රමාණය පුළුල් කරන අතර ඉරානය නිසා සැපයුමට ඇති තාවකාලික පීඩනය සමනය කිරීමට උපකාරී වනු ඇත,” යනුවෙන් බෙසන්ට් X හි සටහනක පැවසීය.

“සාරාංශයක් ලෙස, අපි එපික් ෆියුරි මෙහෙයුම අඛණ්ඩව කරගෙන යන විට තෙල් මිල අඩු මට්ටමක තබා ගැනීම සඳහා ටෙහෙරානයට එරෙහිව ඔවුන්ගේ තෙල් බැරල් භාවිත කරන්නෙමු,” යනුවෙන් බෙසන්ට් පැවසීය.