කෘත්‍රිම බුද්ධි තාක්‍ෂණය භාවිත කරමින් තමාගේ පන්තියේ සිසුවියන් සිව්දෙනෙකුගේ ඡායාරූප විකෘති කර ඒවා පාසල් වට්ස්ඇප් සමූහ හරහා හුවමාරු කළ බව කියන පාසල් සිසුන් දෙදෙනකු ජුනි 13 වැනිදා දක්වා රක්ෂිත බන්ධනාගාරගත කර තිබේ.

හොරණ මහේස්ත්‍රාත් චන්දන කලංසූරිය මෙම නියෝගය නිකුත් කර ඇති අතර සැකකරුවන් බන්ධනාගාර බලධාරීන් විසින් පාලනය කරනු ලබන බාලවයස්කාර රැඳවුම් මධ්‍යස්ථානයක රඳවා තබන ලෙස ද මහේස්ත්‍රාත්වරයා නියෝග කර ඇත.

මෙම සිදුවීම අනාවරණ වී ඇත්තේ, සිද්ධියට මුහුණ පෑ දැරියකගේ පියා සැකකාර සිසුන් විසින් විකෘති කර සකස් කෙරූ ඡායාරූප දැක ඒ පිළිබඳ පොලිසියට පැමිණිලි කිරීමෙන් පසුවයි.

අනතුරුව සිසුන් දෙදෙනා අත්අඩංගුවට ගෙන අධිකරණයට ඉදිරිපත් කර ඇත.

සැකකාර සිසුන් එළඹෙන අ.පො.ස. සාමාන්‍ය පෙළ විභාගය සඳහා පෙනීසිටීමට නියමිත දෙදෙනකු බව ද වාර්තා වේ.