අන්තර්ජාතික වෙළෙඳපොළෙන් ඉන්ධන මිලදී ගැනීමේදී පවතින තරගකාරීත්වය ඉහළ නැංවීමේ අරමුණින්, ලංකා ඛනිජ තෙල් නීතිගත සංස්ථාව විසින් රුසියානු රාජ්‍ය සතු සමාගම් දෙකක් ලංකාවේ ලියාපදිංචි කර තිබේ.

මේ හරහා එම සමාගම්වලට ඉදිරි ටෙන්ඩර් ක්‍රියාවලීන් සඳහා දායකවීමට අවස්ථාව හිමිවන බව සංස්ථා නිලධාරියෙක් ඊයේ ප්‍රකාශ කළේය.

මෙසේ ලියාපදිංචි කර ඇති එක් රුසියානු සමාගමක් වන්නේ ‘රොස්නෙෆ්ට්’ (Rosneft) සමාගමයි.

රුසියාවට එරෙහිව පනවා ඇති ඇමෙරිකානු සම්බාධක ඉවත්කර පවතින තාක් කල්, ශ්‍රී ලංකා වෙළෙඳපොළට ඉන්ධන සැපයීම සඳහා වන තරගකාරී ලංසු තැබීමේ ක්‍රියාවලියට සහභාගී වීමට මෙම සමාගමට අවස්ථාව පවතී.

ලංකා ඛනිජ තෙල් නීතිගත සංස්ථාවේ කළමනාකාර අධ්‍යක්ෂ ආචාර්ය මයුර නෙත්තිකූමර සඳහන් කළේ මෙම ලියාපදිංචි කිරීම් පසුගිය සතියේදී සිදුකළ බවයි.

මීට පෙර, වෙස්ට් ටෙක්සාස් ඉන්ටර්මීඩියට් වර්ගයේ ඇමෙරිකානු බොරතෙල් මිලදී ගැනීම සඳහා ශ්‍රී ලංකා බලධාරීන් අනුමැතිය ලබා දී තිබූ අතර, ඊට අදාළ පළමු තෙල් නැව පසුගියදා දිවයිනට ළඟාවිය.

කෙසේවෙතත්, ලංකා ඛනිජ තෙල් නීතිගත සංස්ථාවේ සභාපති ඩී.ජේ. රාජකරුණා පෙන්වා දුන්නේ, ඉහළ නැව් ගාස්තු සහ ප්‍රවාහනය සඳහා ගතවන දීර්ඝ කාලය හේතුවෙන් ඇමෙරිකානු තෙල් මිලදී ගැනීම සැමවිටම තරගකාරී මිලකට සිදුකළ නොහැකි බවයි. “ඇමෙරිකාවේ සිට තෙල් නැවක් පැමිණීමට අවම වශයෙන් මාසයක කාලයක් ගතවෙනවා” යැයි සභාපතිවරයා පැවසීය.

මේ අතර, ඉන්ධන සහනාධාරය පිළිබඳව මාධ්‍ය නැඟූ ප්‍රශ්නයකට පිළිතුරු දෙමින් සභාපතිවරයා කියාසිටියේ ඒ සඳහා රුපියල් බිලියන 57ක් වෙන්කර ඇති බවයි.

දැනට වෙන්කර ඇති එම මුදල අවසන් වූ පසු, ඉදිරියට තවත් ප්‍රතිපාදන වෙන්කරන්නේ ද යන්න පිළිබඳව මෙතෙක් කිසිදු තීරණයක් ගෙන නොමැති බව ද ඔහු වැඩිදුරටත් සඳහන් කළේය.