බදු හැඳුනුම් අංකයක් (TIN) සඳහා අප්‍රේල් 1 වැනිදාට පෙර ලියාපදිංචි විය යුතු බවට තිබූ නියමය ප්‍රායෝගික වශයෙන් ක්‍රියාත්මක නොවන බව වාර්තා වේ.

කලින් නියම කර තිබුණේ වයස අවුරුදු 18ට වැඩි සියලුම දෙනා අප්‍රේල් 1 වැනිදාට පෙර ලියාපදිංචි වියයුතු බවටයි.

දේශීය ආදායම් දෙපාර්තමේන්තුවේ අභ්‍යන්තර ආරංචි මාර්ගවලින් වාර්තා වන්නේ බදු හැඳුනුම් අංකය ලබා ගැනීමට මහජනතාවට යම් කාලයක් අවශ්‍ය බව රජය තේරුම් ගෙන ඇති බැවින් අයදුම් කළ අය සඳහා අංක නිකුත් කරන අතරතුර, කලින් අනිවාර්ය කාල සීමාව තවදුරටත් ක්‍රියාත්මක නොවන බවයි.

මේ අතර, දේශීය ආදායම් දෙපාර්තමේන්තුවේ සාමාන්‍ය සේවක සංගමයේ ප්‍රධාන ලේකම් අජිත් පුෂ්පකුමාර පවසන්නේ මේ වන විට නිකුත් කර ඇත්තේ බදු හැඳුනුම් අංක 100,000ක් පමණ බවයි.

ආර්ථික අර්බුදයේ බලපෑම් සමඟ දැනටමත් පොරබදමින් සිටින මහජනතාවගේ පීඩනය හේතුවෙන් අනිවාර්ය කාලසීමාව ප්‍රායෝගික නොවන බව සළකනු ලැබ ඇති බව ඔහු පැවසීය.

පසුගිය වසරේ 2024 අයවැය ඉදිරිපත් කිරීමේදී රජය නිවේදනය කළේ බදු හැඳුනුම් අංක සඳහා ලියාපදිංචි නොවූ අයට රු. 50,000ක දඩයක් පැනවෙන බවයි

ජංගම බැංකු ගිණුමක් ආරම්භ කිරීමට, ගොඩනැගිලි සැලැස්මක් සඳහා අනුමැතිය ලබා ගැනීමට, මෝටර් රථයක් ලියාපදිංචි කිරීමට හෝ බලපත්‍ර අලුත් කිරීමට සහ දේපළක් හෝ ඉඩමක් ලියාපදිංචි කිරීමට බදු හැඳුනුම් අංකය අනිවාර්ය අවශ්‍යතාවක් බවට පත් කිරීමට ද අයවැයෙන් යෝජනා කර තිබිණි.

දේශීය ආදායම් දෙපාර්තමේන්තුවේ කොමසාරිස් ජනරාල් ඩබ්ලිව්.ඒ.එස්. චන්ද්‍රසේකර පවසන්නේ පුද්ගලයකු බදු හැඳුනුම් අංකය සඳහා ඉල්ලුම් කළ විට දෙපාර්තමේන්තුව එය අඛණ්ඩව නිකුත් කරන බවයි.

වාර්තාවලට අනුව, 2019 දී පෞද්ගලික ආදායම් බදු ලිපිගොනු මිලියන 1.7ක් තිබී ඇති අතර එය 2022 වන විට 204,467 දක්වා අඩු වී ඇත.

කෙසේවෙතත්, 2023 දී එම සංඛ්‍යාව නැවතත් 500,196 දක්වා වැඩි වී තිබේ.