ලොව පුරා පුනර්ජනනීය බලශක්තිය දෙසට වේගවත් සංක්‍රමණයක් සිදුවෙමින් පවතින පසුබිමක, හරිත තාක්ෂණික නිෂ්පාදන සහ සැකසුම් ධාරිතාව අතින් ලෝකයේ පෙරමුණ ගැනීමට චීනය සමත්ව සිටී.

මේ යටතේ චීනය මේ වන විට ටිබෙට් කලාපය කේන්ද්‍ර කරගනිමින් දැවැන්ත හරිත යටිතල පහසුකම් සංවර්ධනය කරමින් සිටින අතර, ඊට මහා පරිමාණ සූර්ය බලශක්ති ව්‍යාපෘති මෙන්ම යාර්ලුන්ග් සන්ග්පෝ නදිය හරහා ඉදි කිරීමට සැලසුම් කර ඇති මෙටොක් මෙගා වේල්ලද ඇතුළත් වේ.

මීට අමතරව, පිරිසිදු තාක්ෂණික මෙවලම් සඳහා බහුලව භාවිත වන බැටරි නිෂ්පාදනයට අවශ්‍ය බොහෝ ද්‍රව්‍ය සපයා ගන්නේද මෙම කලාපයෙනි. ඒ අනුව පවන්, සූර්ය සහ ජල විදුලිය ඇතුළු චීනයේ හරිත බලශක්ති සංවර්ධනයේ ප්‍රධානතම කේන්ද්‍රස්ථානය බවට ටිබෙටය පත්ව තිබේ.

මේ අතර, මෑතකදී ටිබෙටයේ නග්චු ප්‍රාන්තයට අයත් අම්ඩෝ ප්‍රාන්තයේ, අම්ඩෝ නගරය අසල දොන්ග්කියාවෝ (Dongqiao) ප්‍රදේශයෙන් අලුතින් ක්‍රෝමයිට් නිධියක් සොයාගෙන ඇත. එමගින් ක්‍රෝමයිට් ලෝපස් සම්පතට තවත් ටොන් මිලියන 1.1 කට වඩා වැඩි ප්‍රමාණයක් අලුතින් එක්ව තිබේ. එමෙන්ම, ල්හෝකා ප්‍රාන්තයේ චුසුම් ප්‍රදේශයේ පිහිටි ලුඕබුෂා පතල් කලාපය තුළ තවත් මෙට්‍රික් ටොන් 738,300 ක ක්‍රෝමයිට් සම්පතක් පවතින බව වාර්තා වේ.

South China Morning Post පුවත්පත පසුගිය ජුනි 8 වැනිදා වාර්තා කළ අන්දමට, ෂිගට්සේ නගරයේ ටින්ක්යේ ප්‍රදේශයෙන් ඉහළ පිරිසිදුතාවකින් යුත් ක්වාර්ට්ස් ලබාගත හැකි නව ප්‍රභවයක්ද චීනය විසින් හඳුනාගෙන තිබේ.

සූර්ය පැනල සහ අර්ධ සන්නායක නිෂ්පාදනය සඳහා අත්‍යවශ්‍ය වන මෙම සුවිශේෂී ද්‍රව්‍යය, මෙතෙක් කල් වෙනත් රටවලින් ආනයනය කිරීමට චීනයට සිදු වූ අතර, මෙම නව සොයාගැනීමත් සමඟ එම ආනයන මත යැපීම අවම කරගැනීමට ඔවුන් බලාපොරොත්තු වේ.

මෙම නවතම සොයාගැනීම් සියල්ලෙන්ම පැහැදිලි වන්නේ ටිබෙට් කලාපය තුළ පවතින උපායමාර්ගික වැදගත්කමකින් යුත් ඛනිජ සම්පත් ගවේෂණය කිරීමට චීනය සිය කටයුතු වේගවත් කර ඇති බවයි.