දකුණු කොරියාව සහ ඊශ්‍රායලය සඳහා දැනට පවතින රැකියා අවස්ථාවන්ට අමතරව, සහන පදනම යටතේ ජපානයේ සහ මැදපෙරදිග රටවල විදේශ රැකියා රැසක් ලබාදීමට පියවර ගෙන ඇති බව ශ්‍රී ලංකා විදේශ සේවා නියුක්ති කාර්යාංශය නිවේදනය කරයි.

ඩුබායි හි ගුවන්තොටුපළ ඉදිකිරීම් ව්‍යාපෘති සඳහා දැනට රැකියා 2,000ක ප්‍රමාණයක් පවතින බවත්, රුපියල් 150,000ක උපරිම පිරිවැයක් යටතේ අයදුම්කරුවන්ට ඉතා ඉක්මනින් එම රැකියා ලබාගත හැකි බවත් එම කාර්යංශයේ සභාපති ආනන්ද ලාල් හෙට්ටිආරච්චි ජනමාධ්‍ය වෙත පැවසීය.

ඊට අමතරව, අධීක්ෂණ තනතුරු (supervisory positions) 800ක් සඳහා ද අවස්ථාව පවතින අතර, ඒ සඳහා වැයවන උපරිම මුදල රුපියල් 180,000ක් බවත්, එම මුදලින් සියලුම වියදම් ආවරණය වන බවත් ඔහු අවධාරණය කළේය.

එමෙන්ම, එක්සත් අරාබි එමීර් රාජ්‍යයේ සුවතා මධ්‍යස්ථානයක රැකියා සඳහා ශ්‍රී ලාංකික උපාධිධාරීන්ට අයදුම් කළ හැකි අතර, අදාළ ආයතනය මගින්ම සියලු වියදම් ආවරණය වන බැවින් ඒ සඳහා කිසිදු මුදලක් අය නොකෙරේ.

මේ අතර ජපානයේ සමාගම් තුනක් සමඟ ද තම ආයතනය එක්ව කටයුතු කරන බව පෙන්වා දුන් හෙට්ටිආරච්චි, ජපන් ඉදිකිරීම් සමාගමක් සමඟ ඇති කරගත් අවබෝධතා ගිවිසුමකට අනුව නියමු ව්‍යාපෘතියක් ලෙස සපුගස්කන්දේදී සිසුන් 23 දෙනෙකු පුහුණුව ලබමින් සිටින බව පැවසීය. තාක්ෂණික කුසලතා සහ ජපන් භාෂාව සඳහා වන එම පුහුණු වියදම් අදාළ සමාගම විසින්ම දරනු ලබන අතර, ඉදිරියේදී මෙම රැකියා අවස්ථා තවදුරටත් පුළුල් කිරීමට සැලසුම් කර ඇත.

ජපන් සමාගමක් වන මෙටා ටෙක්නෝ ආයතනය සමඟ ද නියෝජිතායතනය ගිවිසුමකට එළඹ ඇති අතර, එමගින් මූලික ජපන් භාෂා දැනුම ඇති තොරතුරු හා සන්නිවේදන තාක්ෂණ (ICT) උපාධිධාරීන්ට රැකියා මාර්ග විවර වේ.

එසේම, පාසල් හැරගිය තරුණ තරුණියන් සඳහා ට්‍රක් රථ රියදුරන් ලෙස රැකියා 1,000ක් ලබාදීමට තවත් ජපන් සමාගමක් ඉදිරිපත්ව සිටින අතර, ඒ සඳහා සැහැල්ලු වාහන රියදුරු බලපත්‍රයක් සහ ජපන් භාෂා දැනුම තිබීම අවශ්‍ය වේ. අවශ්‍යතාවය පරිදි එම සුදුසුකම් සපයා ගැනීමට අයදුම්කරුවන්ට සහාය වීමට ද සූදානම් බව ශ්‍රී ලංකා විදේශ සේවා නියුක්ති කාර්යාංශය සඳහන් කරයි.

මෙම රැකියා අවස්ථා පිළිබඳ වැඩිදුර තොරතුරු ශ්‍රී ලංකා විදේශ සේවා නියුක්ති කාර්යාංශයේ නිල වෙබ් අඩවියෙන් සහ ෆේස්බුක් පිටුවෙන් ලබාගත හැකිය.