ශ්‍රී ලංකාවේ නව චීන තානාපති ලෙස පත්වූ වෙයි හුවාෂියං, පසුගියදා අභාවප්‍රාප්ත ගරු ආර්.ජී. සේනානායකගේ පවුලේ සාමාජිකයන් හමුවිය.

ආර්.ජී. සේනානායක ශ්‍රී ලංකාවේ හිටපු වෙළෙඳ හා වාණිජ අමාත්‍යවරයෙකු වන අතර, ශ්‍රී ලංකාව සහ චීනය අතර 1952 වසරේදී අත්සන් තැබුණු ඓතිහාසික රබර් සහ සහල් ගිවිසුම (Rubber-Rice Pact) සාකච්ඡා කර සකස් කිරීමේදී ප්‍රමුඛ කාර්යභාරයක් ඉටුකළ අයෙකි.

මෙම හමුවේදී තානාපති වෙයි, දෙරට අතර දීර්ඝකාලීන රාජ්‍යතාන්ත්‍රික සහ ආර්ථික සබඳතා අගයමින් ඒවා අඛණ්ඩව පවත්වාගෙන යෑමට චීනයේ ඇති කැපවීම යළිත් තහවුරු කළේය.

චීනය තම ඓතිහාසික මිතුරන් කිසිදා අමතක නොකරන බවද ඔහු අවධාරණය කළේය.

රබර් සහ සහල් ගිවිසුම වැනි මුල්කාලීන ඓතිහාසික සන්ධිස්ථාන හරහා ගොඩනැගුණු දෙරටේ දිගුකාලීන මිත්‍රත්වය ආරක්ෂා කරමින් එය අනාගත පරම්පරාවන් වෙත ද උරුම කර දීමට තමන් බලාපොරොත්තු වන බව තානාපතිවරයා වැඩිදුරටත් ප්‍රකාශ කළේය.