කැසිනෝ ප්‍රවේශ ගාස්තු සහ ඔට්ටු ඇල්ලීම හා සම්බන්ධ ක්‍රීඩා බදු දේශීය ආදායම් දෙපාර්තමේන්තුව විසින් ඉහළදමා ඇති අතර, සංශෝධිත ගාස්තු 2026 ජනවාරි 1 වැනිදා සිට ක්‍රියාත්මක වීමට නියමිතය.

2025 දෙසැම්බර් 31 වැනිදා නිකුත්කරන ලද නිවේදනයකට අනුව, කැසිනෝ ප්‍රවේශ බද්ද එක් අයකුට අමෙරිකානු ඩොලර් 50 සිට අමෙරිකානු ඩොලර් 100 දක්වා වැඩිකර ඇත.

මෙරට කැසිනෝ හෝ ඒ හා සම්බන්ධ ක්‍රීඩා ආයතනයකට ඇතුළු වන සෑම පුද්ගලයකුගෙන්ම බද්ද අයකරනු ලබන අතර, එය අමෙරිකානු ඩොලර්වලින් හෝ වෙනත් පරිවර්තනය කළ හැකි විදේශ මුදල්වලින් හෝ ශ්‍රී ලාංකික පුරවැසියන් නම් ශ්‍රී ලංකා රුපියල්වලින් ගෙවිය යුතුය.

මීට අමතරව, ඔට්ටු ඇල්ලීමේ සහ ක්‍රීඩා ව්‍යාපාර සඳහා පනවා ඇති එකතුකිරීමේ දළ බද්ද සියයට 15 සිට සියයට 18 දක්වා වැඩි කර ඇත.

සංශෝධිත බද්ද මසකට රුපියල් මිලියන 1 ඉක්මවන දළ එකතුකිරීම් සඳහා අදාළ වන අතර එය 2026 ජනවාරි 1 වැනිදා සිට ක්‍රියාත්මක වේ.

2025 අංක 25 දරන ඔට්ටු ඇල්ලීමේ සහ සූදු බදු (සංශෝධන) පනත යටතේ 1988 අංක 40 දරන ඔට්ටු ඇල්ලීමේ සහ සූදු බදු පනතට සංශෝධන මගින් මෙම වෙනස්කම් හඳුන්වා දී ඇත.

ක්‍රියාත්මක වන දින සිට කැසිනෝ ක්‍රියාකරුවන් සහ ඔට්ටු ඇල්ලීමේ සහ සූදු ක්‍රීඩාවේ නියැලී සිටින ව්‍යාපාර නව බදු ව්‍යුහයට අනුකූල වියයුතු බව දේශීය ආදායම් දෙපාර්තමේන්තුව පැවසීය.

දේශීය ආදායම් කොමසාරිස් ජනරාල් විසින් නිවේදනය නිකුත්කර ඇති අතර, දෙපාර්තමේන්තුවේ බදු පරිපාලනය සහ ඔට්ටු ඇල්ලීමේ සහ සූදු බදු අංශ හරහා වැඩිදුර පැහැදිලිකිරීම් ලබාගත හැකි බව සඳහන් කර තිබේ.