ඇමරිකානු ඩොලර් මිලියන 2.5ක සයිබර් සොරකම සම්බන්ධයෙන් හෙළිදරව් කළ ‘නිදහස් නීතිඥයෝ’ නම් සංවිධානය, මුදල් අමාත්‍යාංශ ලේකම් හර්ෂණ සූරියප්පෙරුමට ඉල්ලා අස්වන ලෙස බලකර සිටී.

භාණ්ඩාගාර ලේකම් හර්ෂණ සූරියප්පෙරුම ණය ආපසු ගෙවීම සඳහා අවසාන අනුමැතිය ලබා දෙන බැවින් ඔහු ද මේ සඳහා වගකිව යුතු එක් පාර්ශ්වයක් බව නිදහස් නීතිඥයෝ සංවිධානයේ ප්‍රධානී මෛත්‍රී ගුණරත්න සඳහන් කරයි.

ඔවුන් අල්ලස් හෝ දූෂණ චෝදනා විමර්ශන කොමිසමට මේ සම්බන්ධයෙන් පැමිණිල්ලක් ඉදිරිපත් කරන්නේදැයි කළ විමසීමකදී, ඒ සඳහා ඇති හැකියාව ගුණරත්න බැහැර කර නැත.

“වැඩිදුර තොරතුරු සොයා ගැනීමට අපි යම් කාලයක් බලා සිටිනවා, ඉන්පසු ඊළඟ පියවර සමඟ ඉදිරියට යනවා,” යැයි ඔහු පැවසීය.

ඇමරිකානු ඩොලර් මිලියන 2.5ක් විදේශීය බැංකුවක ගිණුමකට මාරු කර ඇති බවට විශ්වාස කෙරෙන බවට ඔහු චෝදනා කළේය.

“අපට ලැබී ඇති තොරතුරු අනුව එය විදේශීය බැංකුවකට ගිහින්,” යනුවෙන් ඔහු පැවසීය.

“කෙසේවෙතත්, සොරකම පිටුපස සිටින්නේ කවුරුන්ද යන්න අපි තවමත් සොයාගෙන නැහැ,” ඔහු තවදුරටත් පැවසීය.

නිදහස් නීතිඥයෝ සමඟ සම්බන්ධ සිවිල් සමාජ ක්‍රියාකාරික රජිත් කීර්ති තෙන්නකෝන් පැවසුවේ මහ බැංකුව ද මෙම සිද්ධියේ වගකිවයුතු පාර්ශවයක් බවයි.

“සාමාන්‍යයෙන් ණය ආපසු ගෙවීම සම්බන්ධයෙන් උපදෙස් දෙන්නේ මහ බැංකුවයි. මෙය අදියර දහසයකින් යුත් ණය ආපසු ගෙවීමේ ක්‍රියාවලීන්ගෙන් එකක්. එබැවින්, සිද්ධිය සම්බන්ධයෙන් මහ බැංකුවට නිසැකවම කාර්යභාරයක් පැවරී තිබෙනවා,” යනුවෙන් ඔහු පැවසීය.