පාස්කු ඉරිදා එල්ල වූ ප්‍රහාරයට වගකිවයුතු පිරිස් වත්මන් ආණ්ඩුවේ සිටින නිසා ඔවුන් බේරාගැනීමේ වුවමනාවෙන් ආණ්ඩුව කටයුතු කරන බවට පිවිතුරු හෙළ උරුමයේ නායක නීතිඥ උදය ගම්මන්පිල චෝදනා කරයි.

මේ ප්‍රහාරය පිටුපස සුරේෂ් සලේ ඇතුළු ලංකාවේ බුද්ධි අංශ බවට නැඟුණු චෝදනා තාර්කිකව බිඳහෙලූ පසු වෙනත් බොරුවක් හදාගැනීමට ආණ්ඩුව උත්සාහ කළද එය සාර්ථක නොවූ බවද ඔහු පෙන්වාදෙයි.

එමනිසා ආණ්ඩුව මෙම බොරුව තවදුරටත් වැඩිදියුණු කොට පළමුවෙන්ම හිටපු බුද්ධි අංශ ප්‍රධානි මේජර් ජෙනරාල් සුරේෂ් සලේත් ඉන්පසුව හිටපු ජනාධිපති ගෝඨාභය රාජපක්ෂත් අත්අඩංගුවට ගැනීමට සැලසුමක් ක්‍රියාත්මක වන්නේ යැයිද හෙතෙම කියයි.

පිවිතුරු හෙළ උරුමය පක්ෂ කාර්යාලයේ ඊයේ (03දා) පැවැති ජනමාධ්‍ය හමුවකදී ඔහු මේ බව සඳහන් කළේය.

වත්මන් ආණ්ඩුව බලයට පැමිණියේ පාස්කු දා එල්ල වූ ප්‍රහාරය පිටුපස සිටින මහමොළකරුවා අල්ලා ගන්නා බව පවසමින් යැයිද හෙතෙම පැවැසීය.

සැබෑ ලෙසම මේ ප්‍රහාරයට වගකිවයුත්තන් ආණ්ඩුවේ සිටින බවට ඔහු චෝදනා කළේය.

එම නිසා කවුරුන් හෝ අයෙක් මහමොළකරු බවට පත්කොට සැබෑ වගකිවයුත්තන් බේරාගැනීමේ වුවමනාවෙන් ආණ්ඩුව පෙළෙන බවට ඔහු සඳහන් කළේය.