ප්‍රකට බොලිවුඩ් නළු රන්වීර් සිංට එරෙහිව පනවා තිබූ ‘අසහයෝගිතා නියෝගය’ (Non-Cooperation Directive) වහාම ක්‍රියාත්මක වන පරිදි ඉල්ලා අස්කර ගැනීමට බටහිර ඉන්දීය සිනමා සේවක මහා සම්මේලනය (FWICE) පියවර ගෙන තිබේ.

මේ සමඟ ගිවිසුම්ගත බැඳීම් සහ සිනමා කර්මාන්තය තුළ පැනනඟින ගැටලු නිරාකරණය කරගැනීම පිළිබඳව පැවති දැඩි කතාබහක් නිමාවට පත්ව ඇත.

ප්‍රකට සිනමාකරු ෆර්හාන් අක්තාර්ගේ නිෂ්පාදනයෙන් එළිදැක්වීමට නියමිතව තිබූ ‘ඩොන් 3’ චිත්‍රපටයෙන් රන්වීර් සිං ඉවත් වූ බව වාර්තා විය.

ඒ සම්බන්ධයෙන් කරුණු විමසීමට FWICE සංවිධානය අවස්ථා කිහිපයකදී ඔහුව කැඳවූ ද, ඊට ප්‍රතිචාර නොදැක්වීම හේතුවෙන් ඔවුන් තම සාමාජිකයන්ට නියෝග කර තිබුණේ රන්වීර් සමඟ වැඩ කටයුතු කිරීමෙන් වළකින ලෙසයි.

වියදම අධික මෙවැනි චිත්‍රපටයකින් ප්‍රධාන නළුවා ඉවත්වීම නිෂ්පාදකයන්ට මෙන්ම සිනමා ක්ෂේත්‍රයට ද විශාල මූල්‍යමය හා කාලසටහන් අවුල්වීම්වලට හේතු වේ.

කෙසේවෙතත්, ඉන්දීය චලන චිත්‍ර නිෂ්පාදකයන්ගේ සංගමයේ (IMPPA) මැදිහත්වීම සහ සිනමා ක්ෂේත්‍රයේ ප්‍රධානීන් සමඟ පැවැති සාකච්ඡාවලින් පසු මෙම ගැටලුව සුහදව විසඳා ගැනීමට දෙපාර්ශවයම එකඟ වී තිබේ.

ගැටුම් ඇතිකර ගන්නවාට වඩා සාකච්ඡා මාර්ගයෙන් ප්‍රශ්න විසඳාගැනීමට හැකි බවට මෙම එකඟතාව කදිම ආදර්ශයක් බව සිනමා විචාරකයෝ පවසති.

මෙම තීරණයත් සමඟ සිනමා ක්ෂේත්‍රයේ පවතින නොසන්සුන්කාරී තත්ත්වය පහව ගොස් ඇති අතර, රන්වීර් සිංගේ ඉදිරි නිර්මාණ කටයුතු ද බාධාවකින් තොරව කරගෙන යෑමට මින් මඟපෑදෙනු ඇත.

කෙසේවෙතත්, මෙම සිදුවීම හරහා නළු නිළියන්, නිෂ්පාදකයන් සහ වෘත්තීය සමිති අතර පවතින වෘත්තීයමය බැඳීම් හා වගවීම් පිළිබඳව ක්ෂේත්‍රය තුළ යළිත් දැඩි අවධානයක් යොමුව තිබේ.