වත්කම් සහ බැරකම් හෙළි කිරීමට අවශ්‍ය පුද්ගලයන්ගේ පරාසය පුළුල් කරමින් 1988 අංක 74 දරන පනත හරහා බලාත්මක කරන ලද 1975 අංක 01 දරන වත්කම් හා බැරකම් ප්‍රකාශ කිරීමේ නීතියට හඳුන්වා දුන් නව සංශෝධනය ක්‍රියාත්මක කිරීමට රජය විසින් පියවර තිබේ.

2023 අංක 09 දරන දූෂණ විරෝධී පනතේ 80 වැනි වගන්තිය යටතේ හඳුන්වා දී ඇති මෙම සංශෝධනය රාජ්‍ය සේවයේ විනිවිදභාවය සහ වගවීමේ වැදගත්කම අවධාරණය කරන අතර රට තුළ විනිවිදභාවය ප්‍රවර්ධනය කිරීම, දූෂණයට එරෙහිව සටන් කිරීම සහ යහපාලනය දිරිගැන්වීම අරමුණු කර තිබේ.

යාවත්කාලීන කරන ලද නීති යටතේ මූල්‍ය තොරතුරු හෙළි කිරීමට අවශ්‍යවන නිලධාරීන් සහ පුද්ගලයන්ගේ කාණ්ඩය පුළුල් පරාසයකට විහිදේ.

ජනාධිපතිවරයා, අගමැති, පාර්ලිමේන්තු මන්ත්‍රීවරුන්, පළාත් ආණ්ඩුකාරවරුන් සහ පළාත් සභා මන්ත්‍රීවරුන් වැනි රජයේ ඉහළ පෙළේ නිලධාරීන් ද මෙයට ඇතුළත් වීම විශේෂත්වයකි.

මීට අමතරව, පළාත් රාජ්‍ය සේවයේ නිලධාරීන්, තේරී පත් වූ නියෝජිතයන් සහ පළාත් පාලන ආයතනවල නිලධාරීන් ද මෙම කාණ්ඩයට යටත් වේ.

තවද, විනිසුරුවරුන්, ජනාධිපතිවරයා විසින් පත් කරන ලද රජයේ නිලධාරීන්, අමාත්‍යංශවල සහ රජයේ දෙපාර්තමේන්තු වල සාමාජිකයන් සහ නිලධාරීන් සහ ආණ්ඩුක්‍රම ව්‍යවස්ථාවේ 41A(1)(e) වගන්තිය යටතේ පත් කරනු ලබන පුද්ගලයන් නව හෙළිදරව් විධිවිධානවලට අනුකූල විය යුතුය.

ආණ්ඩුක්‍රම ව්‍යවස්ථාවේ 41B වගන්තියේ උපලේඛනයේ දක්වා ඇති පිරිස මෙන්ම ශ්‍රී ලංකා මහ බැංකුවේ සහ රාජ්‍ය බැංකුවල මාණ්ඩලික නිලධාරීන් ඇතුළු විවිධ කොමිෂන් සභා සඳහා මෙම හෙළිදරව් කිරීම අදාළ වේ.

ස්වාධීන කොමිෂන් සභා, නියාමන ආයතන, අධීක්ෂණ කොමිෂන් සභා සහ ව්‍යවස්ථාව යටතේ ස්ථාපිත පුද්ගල මණ්ඩල ද එමගින් ආවරණය වෙයි.

ඊට අමතරව, හමුදා නිලධාරීන්, මැතිවරණ නිලධාරීන්, දේශපාලන පක්ෂවල සහ වෘත්තීය සමිතිවල නිලධාරීන්, මැතිවරණ සඳහා නම් කරන ලද අපේක්ෂකයන් සහ මාධ්‍ය සමාගම්, පුවත්පත් සහ විදුලි සංදේශ ක්ෂේත්‍රයට සමඟ සම්බන්ධ පුද්ගලයන් ද ඇතුළත් වේ.

වත්කම් හා බැරකම් ප්‍රකාශ කිරීමේ ක්‍රියාවලිය පහසු කිරීම සඳහා, මධ්‍යගත ඉලෙක්ට්‍රොනික පද්ධතියක් ස්ථාපිත කිරීමට නියමිතය.

ඉලෙක්ට්‍රොනික පද්ධතිය සම්පූර්ණයෙන් ක්‍රියාත්මක වන තුරු, නව පනතේ විධිවිධානවලට අනුකූලව ප්‍රකාශන ක්‍රියාවලිය විධිමත් කිරීම සඳහා සංශෝධන හඳුන්වා දී ඇත.

2023 අංක 09 දරන දූෂණ විරෝධී පනතට අනුකූලව වත්කම් බැරකම් ප්‍රකාශ කිරීමේ ක්‍රියා පටිපාටිය ඇතුළත් චක්‍රලේඛයක් අල්ලස් හෝ දූෂණ චෝදනා විමර්ශන කොමිෂන් සභාව විසින් නිකුත් කර ඇත.

සංශෝධිත ප්‍රකාශන පෝරම 2024 මාර්තු 1 සිට ඔවුන්ගේ වෙබ් අඩවියෙන් (www.ciaboc.gov.lk) බාගත කර ගැනීමට හැකියාව තිබේ.

වැඩිදුර උපදෙස් ලබා දෙන තුරු චක්‍රලේඛයේ දක්වා ඇති මාර්ගෝපදේශයන්ට අනුව ඔවුන්ගේ වත්කම් සහ බැරකම් ප්‍රකාශයන් කඩිනමින් ඉදිරිපත් කරන ලෙස කොමිෂන් සභාව අදාළ සියලුම නිලධාරීන්ට දැනුම්දී තිබේ.