වර්තමානයේ කෘත්‍රිම බුද්ධි තාක්ෂණය ලොව ප්‍රබලම මෙවලමක් ලෙස සැලකුණ ද තවමත් ලෝකයේ බලවත් වන්නේ මිනිසාගේ මනස බව එක්සත් ජාතික පක්ෂයේ නායක හිටපු ජනාධිපති රනිල් වික්‍රමසිංහ පවසයි.

ගාල්ල ප්‍රදේශයේ පැවැති ආගමික උත්සවයකට එක්වෙමින් ඔහු පැවසුවේ කෘත්‍රිම බුද්ධිය අඛණ්ඩව ඉදිරියට යන අතරතුර පවා ආගම අත්‍යවශ්‍ය බව සහ මිනිසාගේ මනස තාක්‍ෂණයෙන් ප්‍රතිස්ථාපනය කළ නොහැකි බවයි.

කෘත්‍රිම බුද්ධියේ (AI) වේගවත් සංවර්ධනය අවසානයේ ආගම අනවශ්‍ය දෙයක් බවට පත් කළ හැකි බවට ඇතැමුන් තර්ක කරන නමුත්, හිටපු ජනාධිපතිවරයා පැවසුවේ තමන් එම මතය ප්‍රතික්ෂේප කරන බවයි.

අධ්‍යාත්මික සම්ප්‍රදායන් යන්ත්‍රවලට ළඟාවිය නොහැකි මානව අත්දැකීම්වල මානයන් ආමන්ත්‍රණය කරන බව ද ඔහු එහිදී පැවසුවේය.

එමෙන්ම හිටපු ජනාධිපතිවරයා පැවසුවේ තමන් මෑතකදී කෘත්‍රිම බුද්ධිය සහ මිනිසාගේ මනස සම්බන්ධයෙන් ChatGPT සමඟ සංවාදයක නිරත වූ බවයි.

එහිදී ධම්මපදයේ ආරම්භක පදය උපුටා දක්වමින්, මිනිස් මනස සහ කෘත්‍රිම බුද්ධිය යන අතරින් උසස් කුමක්දැයි ChatGPT වෙතින් විමසා සිටි බවත්, එහිදී එම AI පද්ධතිය මගින් කෘත්‍රිම බුද්ධිය සීමිත හැකියාවන් සමඟ ක්‍රියාත්මක වන බැවින්, මිනිස් මනස උසස් බව පිළිතුරු ලෙස ලැබුණු බවත් රනිල් වික්‍රමසිංහ පැවසුවේය.