නොවැම්බර් මාසයේ සිදු කළ ඉන්ධන මිල ඉහළ නැංවීම් හමුවේ වුවද, දේශීය වෙළඳපොළේ ඉන්ධන මිල තවමත් පිරිවැය පියවා ගැනීමේ මට්ටමට පැමිණ නොමැති බව වේරිටේ රිසර්ච් ආයතනය පෙන්වා දෙයි. ඒ අනුව, ඔටෝ ඩීසල් සහ ඔක්ටේන් 92 පෙට්‍රල් යන දෙකම ඉන්ධන මිල සූත්‍රයට අනුව නියම විය යුතු පිරිවැය පියවීමේ මිලට වඩා අඩුවෙන් තවදුරටත් අලෙවි වන බව එම ආයතනය සඳහන් කරයි.

වේරිටේ රිසර්ච්හි විශ්ලේෂණයන්ට අනුව, නොවැම්බර් මාසයේ සිදු වූ මිල සංශෝධනයත් සමඟ ඔටෝ ඩීසල් ලීටරයක වෙළඳපොළ මිල සහ පිරිවැය පියවා ගැනීමේ මිල අතර පැවති පරතරය රුපියල් 62 දක්වා අඩු වී තිබේ. ඩීසල් වෙළඳපොළ මිල ඉහළ යාම සහ සූත්‍රයට අනුව නියම කළ මිලෙහි දක්නට ලැබුණු සුළු පහත වැටීම ඊට ප්‍රධාන හේතුව වී ඇත.

කෙසේ වෙතත්, ඔක්ටේන් 92 පෙට්‍රල් සඳහා පැවති පරතරය රුපියල් 57 දක්වා තවත් වැඩි වී තිබේ. මිල ඉහළ දැමූ වේගයට වඩා වැඩි වේගයකින් සූත්‍රය මත පදනම් වූ මිල ඉහළ යාම මීට හේතුවයි.

මීට අමතරව, ඔක්තෝබර් මාසයේදී හඳුන්වා දුන් ලීටරයකට රුපියල් 70 ක සහනාධාරය ඩීසල් මිල සූත්‍රයට තවදුරටත් ඇතුළත්ව පවතින බවද වේරිටේ රිසර්ච් ආයතනය වැඩිදුරටත් සඳහන් කරයි.

PublicFinance.lk වෙබ් අඩවිය මගින් පවත්වාගෙන යනු ලබන Fuel Price Tracker හරහා මෙම නවතම දත්ත ලබා දී ඇත.