ශ්‍රී ලංකාවේ මෙහෙයුම්වල නිරතවූ ඉන්දීය සාම සාධක හමුදාවේ සමස්ත ආරක්ෂක හමුදා අණදෙන නිලධාරියා ලෙස කටයුතු කළ ලුතිනන් ජෙනරාල් දීපින්දර් සිං පසුගිය සතියේ අභාවප්‍රාප්ත විය.

මියයන විටය ඔහුට වයස අවුරුදු 96 කි.

1987 දී ඉන්දියා-ශ්‍රී ලංකා ගිවිසුම අත්සන් කිරීමෙන් අනතුරුව, එල්ටීටීඊය ඇතුළු දෙමළ සටන්කාමී කණ්ඩායම් නිරායුධ කිරීම සඳහා මෙරටට එවන ලද ඉන්දීය සාම සාධක හමුදාවේ ප්‍රධානියා ලෙස ඔහුව පත්කරන ලදී.

එල්ටීටීඊය නිරායුධ කිරීමේ මෙහෙයුම ව්‍යසනයකින් අවසන් වූ අතර, ඉන්දීය හමුදා එල්ටීටීඊ ත්‍රස්තවාදීන් අතින් දරුණු ප්‍රහාරවලට ලක්විය.

මෙහෙයුම්වලදී ඉන්දීය සොල්දාදුවන් 1,100 කට වැඩි පිරිසක් මියගිය අතර 3,000 කට වැඩි පිරිසක් තුවාල ලැබීය.

ජනාධිපති ආර්. ප්‍රේමදාස විසින් ඉන්දීය සාම සාධක හමුදාව මෙරටින් පිටත්කර හරින ලද අතර, ඉන් අනතුරුව 2009 මැයි මාසයේදී ශ්‍රී ලංකා සන්නද්ධ හමුදා විසින් පරාජය කිරීමට පෙර LTTE සංවිධානය තවත් දශක දෙකක් වෙනම රාජ්‍යයක් වෙනුවෙන් ශ්‍රී ලංකාවේ සටන් කළේය.

ශ්‍රී ලංකාවේදී ඉන්දීය සාම සාධක හමුදාවේ අත්දැකීම් පිළිබඳව ලුතිනන් ජෙනරාල් දීපින්දර් සිං පොතක් ලිවීය.

‘ශ්‍රී ලංකාවේ ඉන්දියානු සාම සාධක හමුදාව (1987-1989)’ නම් එම පොතේ, විදේශ රටක ඉන්දීය හමුදා මුහුණ දුන් අභියෝග සහ ශ්‍රී ලංකාවේ ඔවුන්ගේ පරාජයට හේතු වූ සැලසුම් නොමැතිකම ඔහු සිහිපත් කළේය.