ඉදිරි මාසවලදී විදුලි අර්බුදයකට තර්ජනයක් මතු කරන ලද, දකුණු අප්‍රිකාවෙන් මිලදී ගත් ගල් අඟුරු තොග ගුණාත්මක පරීක්ෂණ අසමත් වීමෙන් පසු රජය නීතිමය විකල්ප පිළිබඳ නීතිපතිවරයාගෙන් උපදෙස් ලබා ගැනීමට නියමිත බව වාර්තා වේ.

සමස්ත ගල් අඟුරු ටෙන්ඩරයම දූෂිත බවට මේ වන විට චෝදනා එල්ල වෙමින් තිබේ.

ඉදිරි ගල් අඟුරු ටෙන්ඩර් සඳහා වඩා හොඳ විනිවිදභාවයක් සහතික කිරීම සඳහා වන පියවර සහ පවතින ටෙන්ඩරයට කිසියම් වෙනසක් කළ හැකිද යන්න පිළිබඳ නීතිපතිවරයාගේ උපදෙස් ලබා ගන්නා බව රජයේ ජ්‍යෙෂ්ඨ නිලධාරියෙක් පුවත්පතකට පවසා තිබේ.

ලක්විජය ගල් අඟුරු බලාගාරයේ අභ්‍යන්තර ලේඛනවලින් පෙනී යන්නේ ඉන්දියාවේ ට්‍රයිඩන්ට් කෙම්හාර් ලිමිටඩ් හරහා මිලදී ගත් දකුණු අප්‍රිකානු ගල් අඟුරු තොග තුනක සාම්පල ගුණාත්මක පරීක්ෂණ අසමත් වූ බවයි.

එම සෑම ගල් අඟුරු තොගයකම දළ කැලරි වටිනාකම් බලාගාරයේ දහන ඒකක තුනෙන් ප්‍රශස්ත ලෙස විදුලිය ජනනය කිරීමට අවශ්‍ය මට්ටමට වඩා බෙහෙවින් අඩු බව නිල දත්තවලින් සනාථ වී තිබේ.

ටෙන්ඩරයට අනුව මුළු තොග 23ක් මිලදී ගනු ලැබේ.