මුදල් අමාත්‍යාංශයේ පරිගණක පද්ධතියට අනවසරයෙන් ඇතුළුවී ඇමරිකානු ඩොලර් මිලියන 2.5ක් මාරු කර ඇත්තේ කුමන ගිණුමකටද යන්න පිළිබඳ මහ බැංකුවේ මූල්‍ය බුද්ධි ඒකකය විමර්ශනය කරමින් සිටින බව මහජන ආරක්ෂක අමාත්‍ය ආනන්ද විජේපාල පවසයි.

නිදහස් නීතිඥයෝ සංවිධානය විසින් ප්‍රසිද්ධියේ හෙළිදරව් කිරීමෙන් පසුව, ණය සේවාකරණයේ කොටසක් ලෙස ඕස්ට්‍රේලියාවට ගෙවීමට නියමිත ඇමරිකානු ඩොලර් මිලියන 2.5ක් හැකර්වරුන් විසින් සොරකම් කර ඇති බව මුදල් අමාත්‍යාංශය පිළිගත්තේය.

අපරාධ පරීක්ෂණ දෙපාර්තමේන්තුව සහ මහ බැංකුව වැනි විවිධ ආයතනවල සහභාගීත්වයෙන් පරීක්ෂණයක් සිදුවෙමින් පවතී.

ඊට අමතරව, ඕස්ට්‍රේලියානු ෆෙඩරල් පොලිසිය ද විමර්ශනයට සහාය වේ.

සොරකම් කරන ලද මුදල් ගියේ කුමන ගිණුමකටද යන්න පිළිබඳ මහ බැංකුවේ මූල්‍ය බුද්ධි ඒකකය විමර්ශනය කරමින් සිටින බව අමාත්‍ය විජේපාල සඳහන් කර තිබේ.

මේ සම්බන්ධයෙන් අපරාධ පරීක්ෂණ දෙපාර්තමේන්තුව ඉල්ලීමක් කළ බවත් මූල්‍ය බුද්ධි ඒකකය විමර්ශනය කරන බවත් ඔහු පැවසීය.

සහාය සඳහා ඕස්ට්‍රේලියානු ෆෙඩරල් පොලිසියේ නියෝජිත පිරිසක් මෙහි පැමිණෙනු ඇත්දැයි යන පැනයට පිළිතුරු දෙමින් ඔහු සඳහන්කර තිබුණේ එවැනි අවශ්‍යතාවයක් තවමත් මතු වී නොමැති බවයි.

විමර්ශන තවමත් මූලික මට්ටමේ පවතින බවත් අවශ්‍යතාවක් මතු වුවහොත් ඔවුන්ට ආරාධනා කරන බවත් ඔහු සඳහන් කර ඇත.