“තායිවාන නිදහස” යන ප්‍රකාශයෙන් අදහස් වන්නේ එම දූපත බීජිං පාලනයට අයත් නොවන හෝ ඊට යටත් නොවන බවත්, තම අනාගතය තීරණය කළ හැක්කේ තායිවාන ජනතාවට පමණක් බවත් එරට ජනාධිපති විලියම් ලායි ප්‍රකාශ කළේය.

ජනාධිපති ඩොනල්ඩ් ට්‍රම්ප් සහ චීන ජනාධිපති ෂී ජින්පින් අතර බීජිං නුවරදී පැවැත්වුණු සමුළුවෙන් දින කිහිපයකට පසු ලායි සිය අදහස් මෙලෙස යළිත් අවධාරණය කළේය.

එම සමුළුව හේතුවෙන් තායිවානයට ලැබෙන ඇමෙරිකානු සහයෝගය පිළිබඳව එරට තුළ දැඩි කනස්සල්ලක් මතු විය.

සමුළුවෙන් අනතුරුව ට්‍රම්ප් මහතා Fox News නාලිකාවට පවසා සිටියේ, “එක්සත් ජනපදය අපට පිටුපසින් සිටින නිසා අපි නිදහස කරා යමු’ යැයි කිසිවෙකු පවසනවා දැකීමට අප බලාපොරොත්තු නොවන බවයි.

ප්‍රජාතන්ත්‍රවාදීව පාලනය වන තායිවානය තමන්ගේම භූමියක් ලෙස සලකන චීනය, එය බීජිං පාලනයට නතු කර ගැනීම සඳහා බලය භාවිතා කිරීම කිසිවිටෙකත් ප්‍රතික්ෂේප කර නැත.

විශේෂයෙන්ම තායිවානය නිල වශයෙන් නිදහස ලබා ගැනීමට උත්සාහ කරන බව චීනයට හැඟී ගියහොත් ඔවුන් බලය භාවිතා කිරීමට පෙළඹෙනු ඇත.

කෙසේවෙතත් තායිපේ නුවරදී අදහස් දක්වමින් විලියම් ලායි පැවසුවේ, තම ඩිමොක්‍රටික් ප්‍රගතිශීලී පක්ෂය (DPP) විසින් 1999 දී යෝජනාවක් සම්මත කර ඇති බවත්, තායිවානය දැනටමත් චීන සමූහාණ්ඩුව (Republic of China) නමින් හැඳින්වෙන ස්වෛරී සහ ස්වාධීන රටක් යන්න තවමත් පක්ෂයේ ප්‍රතිපත්තිය ලෙස පවතින බවත්ය.

තායිවානයේ ස්වෛරීභාවය උල්ලංඝනය කිරීමට හෝ වෙනත් රටකට ඈඳා ගැනීමට නොහැකි බවත්, එහි අනාගතය තීරණය කළ යුත්තේ එරට ජනතාව විසින්ම බවත් රජය තරයේ විශ්වාස කරන බව ඔහු වැඩිදුරටත් පැවසීය.