November 14, 2023
භාණ්ඩාගාර ලේකම්වරයාට එරෙහිව ගොනුකර තිබූ අපහාස නඩු දෙකක් ශ්රේෂ්ඨාධිකරණය අද නිෂ්ප්රභ කර ඇත.
පළාත් පාලන මැතිවරණයට අදාළ ශ්රේෂ්ඨාධිකරණ නියෝගයකට අනුව කටයුතු කිරීමට භාණ්ඩාගාර ලේකම්වරයා අපොහොසත් වූ බවට චෝදනා කරමින් සමගි ජන බලවේගයේ මහලේකම් රංජිත් මද්දුම බණ්ඩාර සහ ජාතික ජන බලවේගයේ පාර්ලිමේන්තු මන්ත්රී විජිත හේරත් විසින් මෙම නඩු පවරා තිබිණි.
අගවිනිසුරු ජයන්ත ජයසූරිය, බුවනක අලුවිහාරේ, ප්රියන්ත ජයවර්ධන, විජිත් කේ. මලල්ගොඩ සහ මුර්දු ප්රනාන්දු යන විනිසුරුවරුන්ගෙන් සමන්විත විනිසුරු මඩුල්ල මහා භාණ්ඩාගාර ලේකම්වරයා විසින් ඉදිරිපත් කරන ලද මූලික විරෝධතා මත පදනම්ව මෙම නඩු නිෂ්ප්රභ කර ඇත.
මීට පෙර අවස්ථාවක භාණ්ඩාගාර ලේකම්වරයා වෙනුවෙන් පෙනීසිටි ජ්යෙෂ්ඨ නීතීඥ එරාජ් ද සිල්වා තර්ක කළේ මුදල් ඇමැතිවරයාගේ අනුමැතියකින් තොරව මුදල් නිකුත් කිරීමට භාණ්ඩාගාර ලේකම්වරයාට ව්යවස්ථාපිත බලයක් නොමැති බවයි.
ආණ්ඩුක්රම ව්යවස්ථාවේ 150(1) සහ (2) වගන්තිවලට අනුව ඒකාබද්ධ අරමුදල්වලින් මුදල් නිදහස් කිරීමට ඇමැතිවරයාගෙන් අනුමැතියක් අවශ්ය වේ.
පළාත් පාලන මැතිවරණය සඳහා දෙසැම්බර් මාසයේදී පාර්ලිමේන්තුවේ අයවැය ප්රතිපාදන වෙන්කළද මුදල් නිදහස් කිරීම පාර්ලිමේන්තු පාලනය සහ අනෙකුත් ක්රියා පටිපාටි මත රඳාපවතී.
2023 පෙබරවාරි 14 දිනට පෙර ඇමැතිවරයාගේ නියෝගය මත භාණ්ඩාගාර ලේකම් විසින් මුදල් නිදහස් කරන ලදී.
කෙසේවෙතත්, එදින කැබිනට් මණ්ඩලය තීරණය කළේ මැතිවරණ වියදම් අත්යවශ්ය යැයි සඳහන් නොකර අත්යවශ්ය වියදම් සඳහා පමණක් මුදල් වෙන්කිරීමටයි.
එහි ප්රතිඵලයක් ලෙස, ආණ්ඩුක්රම ව්යවස්ථාව යටතේ, එවැනි අරමුදල් නිදහස් කිරීමට භාණ්ඩාගාර ලේකම්වරයාට තවදුරටත් බලය නැත.
නීතීඥ එරාජ් ද සිල්වා අවධාරණය කළේ භාණ්ඩාගාර ලේකම්වරයාගේ පාර්ශ්වයෙන් හිතාමතා නොසළකාහැරීමක් සිදුනොවූ බවයි.
භාණ්ඩාගාර ලේකම්වරයා වෙනුවෙන් දිනේෂ් විදානපතිරණගේ උපදෙස් මත ජ්යෙෂ්ඨ නීතිඥ එරාජ් ද සිල්වා, දමින්ද විජේරත්න, ජනගන් සුන්දරමූර්ති සහ එන්.කේ. අශෝක්භාරන් පෙනී සිට තිබේ.
