ශ්‍රී ලංකන් ගුවන් සේවයේ පරිගණක පද්ධති වෙත සයිබර් ප්‍රහාරයක් එල්ල කළ හැකර්වරුන් විසින් ක්‍රිප්ටෝ මුදලින් ඇමෙරිකානු ඩොලර් 50,000ක කප්පම් මුදලක් ඉල්ලා සිටි බවත්, ජාතික ගුවන් සේවය තවදුරටත් මෙවැනි සයිබර් ප්‍රහාර හමුවේ අවදානම් තත්ත්වයක පවතින බවත් පාර්ලිමේන්තු මන්ත්‍රී දයාසිරි ජයසේකර චෝදනා කරයි.

පාර්ලිමේන්තුව අමතමින් මන්ත්‍රීවරයා කියා සිටියේ, 2026 ජූනි මාසයේදී ශ්‍රී ලංකන් ගුවන් සේවයේ පද්ධතිවලට මෙම ප්‍රහාරය එල්ල වී ඇති අතර, ඉන් අනතුරුව ප්‍රහාරයේ වගකීම භාරගන්නා බවට හැකර්වරුන් ‘ඩාර්ක් වෙබ්’ අඩවි හරහා ප්‍රකාශ කර ඇති බවයි.

හැකර්වරුන් විසින් ගුවන් සේවා පද්ධතිවල පාලනය තමන් සතු කරගත් බව පවසමින් වීඩියෝවක් පවා නිකුත් කර තිබූ බවත්, එහිදී ඔවුන් ක්‍රිප්ටෝ මුදලින් ඩොලර් 50,000ක කප්පමක් ඉල්ලා සිටි බවත් මන්ත්‍රීවරයා සඳහන් කළේය.

ගුවන් සේවයේ විද්‍යුත් තැපැල් (ඊමේල්) පද්ධති පවා මෙලෙස අනවසරයෙන් ඇතුළු වීමකට ලක්ව ඇති බවත්, එමගින් ආයතනයේ ඩිජිටල් යටිතල පහසුකම්වල ආරක්ෂාව පිළිබඳව බරපතල ගැටලු මතුවන බවත් මන්ත්‍රීවරයා කියා සිටියේය.

මෙම ප්‍රහාරයෙන් පසුව ගුවන් සේවයේ ඊමේල් ආරක්ෂණ පද්ධතියේ ගැටලු මතුවූ බව පැවසූ ඔහු, මෙම සයිබර් ප්‍රහාරය ජාතික ගුවන් සේවයේ මෙහෙයුම් කටයුතුවලට බරපතල බලපෑමක් එල්ල කළ හැකි බවට ද අනතුරු ඇඟවීය.

“තවමත් මේ පද්ධතිය තියෙන්නේ හැකර්වරුන්ගේ අතේ. ඕනෑම වෙලාවක ඔවුන්ට ඒක අක්‍රිය කරන්න පුළුවන්,” යනුවෙන් ද ඔහු වැඩිදුරටත් පැවසීය.

මීට අමතරව, ඩුබායි සහ ඉන්දියාවේ ගිණුම් හරහා සිදුකළ ගෙවීම් සම්බන්ධයෙන් ශ්‍රී ලංකන් ගුවන් සේවයේ මීට පෙර සිදුවූ මූල්‍ය වංචාවන් පිළිබඳව ද මන්ත්‍රීවරයා ප්‍රශ්න කළේය. එම සිදුවීම් සහ ගුවන් සේවයේ සයිබර් ආරක්ෂණ පද්ධතිවල පවතින දුර්වලතාවයන් අතර යම් සම්බන්ධයක් තිබේදැයි ඔහු විමසා සිටියේය.

මෙම සිදුවීම පිළිබඳ පරීක්ෂණ පැවැත්වීමට දැරූ උත්සාහයන්ට බාධා එල්ල වී ඇති බවට චෝදනා කළ මන්ත්‍රීවරයා, පරීක්ෂණයක් පැවැත්වීමට උත්සාහ කළ නිලධාරියෙකුට එරෙහිව ජනාධිපති ලේකම් කාර්යාලය හරහා පරීක්ෂණයක් ආරම්භ කිරීමට කටයුතු කර ඇති බවද කියා සිටියේය.

එමෙන්ම, මෙම සයිබර් ආරක්ෂණ දුර්වලතාවලට විසඳුම් සෙවීම සඳහා සිංගප්පූරුවේ නියෝජිතයින් මාර්ගයෙන් ඇමෙරිකා එක්සත් ජනපදය විසින් සහාය ලබාදීමට යෝජනා කර තිබුණද, රජය මෙතෙක් එම යෝජනාව පිළිගෙන නොමැති බවද ඔහු පැවසීය.

සිදුවූ බව කියන මෙම සයිබර් ප්‍රහාරය පිළිබඳව වහාම පරීක්ෂණයක් පවත්වන ලෙසත්, ගුවන් සේවයේ ඩිජිටල් යටිතල පහසුකම්වල ආරක්ෂාව තහවුරු කරන ලෙසත්, ඉදිරියේදී මෙවැනි ප්‍රහාර වැළැක්වීමට ගෙන ඇති පියවර මොනවාදැයි පැහැදිලි කරන ලෙසත් මන්ත්‍රීවරයා රජයෙන් ඉල්ලා සිටියේය.