මිතුරන් කිහිපදෙනකු සමග එක්වී ලෝක ළමා දිනය සැමරීම සදහා කසිප්පු බෝතලයක් පාසලට ගෙනා බව කියන හයවැනි ශ්‍රේණියේ ඉගෙනුම ලබන11 හැවිරිදි සිසුවකු එම කසිප්පු බෝතලයද සමග ඊයේ (1) තිස්සමහාරාම පොලිසිය භාරයට ගනු ලැබීය.

මෙසේ පොලිස් භාරයට ගත් සිසුවා තිස්සමහාරාම ප්‍රදේශයේ ප්‍රසිද්ධ පාසලක ඉගෙනුම ලබන එම ප්‍රදේශයේම පදිංචි දරුවෙකි.

මෙම සිසුවා පෙරේදා ඔහුගේ පන්තියේම ඉගෙනුම ලබන සම වයසේ පසුවන සිසුන් දෙදෙනකුට තමා ළමා දිනය සැමරීම සඳහා කසිප්පු ගෙන එන බවත් ඒ සඳහා අවශ්‍ය බයිට් මිලදී ගැනීම සඳහා මුදල් රැගෙන එන ලෙසත් දැනුම් දී ඇති බවත් තිස්සමහාරාම පොලිසිය සඳහන් කරයි.

පෙර දින සවස් කාලයේ බෝතලයක කසිප්පු බාගයක් දමාගෙන පාසල් වත්තට හොරරහසේ රිංගා එම බෝතලය පාසල් වත්තේ වළක් හාරා වළදැමූ බව සිසුවා විදුහල්පතිවරයා සමග හෙළිකර ඇතැයි පොලිසිය කියයි.

මේ බව තිස්සමහාරාම පොලිසියේ ළමා හා කාන්තා කාර්යශයට දැනුම් දී එහි නිලධාරීන් දෙදෙනකු සහ නිලධාරිනියක් එම විදුහලට යවා එම බාලවයස්කාර දරුවා කසිප්පු බාගයක් අඩංගු බෝතලයද සමග පොලිස් භාරයට ගෙන තිබේ.

ලෝක ළමා දිනය වෙනුවෙන් පන්තියේ මිතුරන් දෙතුන් දෙනෙකු සමග එක් වී මත්පැන් සාදයක් පැවැත්වීම සඳහා කසිප්පු රැගෙන ආ බව පොලිස් භාරයට ගත් එකොළොස් හැවිරිදි දරුවා ප්‍රශ්න කිරීම්වලදී හෙළිකර ඇත.

තමාගේ බාප්පා කසිප්පු පානය කරන අයකු බවත්, කසිප්පු බෝතලයක් නිවසට රැගෙන ඇවිත් තිබියදී එයින් භාගයක් ඔහුට හොරෙන් බෝතලයකට හළාගෙන එය රැගෙන ඇවිත් පාසල් වත්තේ සැඟවූ බව සිසුවා පවසන්නේ යැයි පොලිසිය කියයි.

සිසුවා පොලිසියට හෙළිකළ තොරතුරු අනුව එම සිසුවාගේ 19 හැවිරිදි බාප්පාද පොලිස් භාරයට ගනු ලැබීය.

පසුව වැඩිදුරටත් පරීක්ෂණ පවත්වා සැකකාර සිසුවාගේ බාප්පාගෙන් කසිප්පු බෝතලය මිලදී ගත් අය ගැන තොරතුරු අනාවරණය කරගෙන ඊයේ කසිප්පු ජාවාරම්කරුවකු බව කියන එම පුද්ගලයාද සැකපිට අත්අඩංගුවට ගත් බව පොලිසිය පැවසීය.

මෙම කසිප්පු ජාවාරම්කරුගේ නිවසේ තිබී කසිප්පු පෙරීමට පදම් කරන ලද ගෝඩා බැරල් දෙකක්ද පොලිස් භාරයට ගෙන තිබේ.

ලෝක ළමා දිනය සැමරීම සඳහා පාසලට කසිප්පු ගෙනා බව කියන සිසුවාගේ මව ඔහු අතහැර ගොස් සිටින අතර පියා කොළඹ ප්‍රදේශයේ රැකියාවක නිරතව සිටින අයෙකි.

ආච්චි සහ සීයා ළඟ සිටිමින් මොහු පාසල් යන බව පොලිසිය සඳහන් කරයි.