නොරොච්චෝලේ ලක්විජය ගල්අඟුරු බලාගාරය සඳහා ගල්අඟුරු මෙට්‍රික් ටොන් 300,000 ක හදිසි ප්‍රසම්පාදනය සඳහා ලංකා ගල් අඟුරු සමාගම (LCC) ටෙන්ඩර් කැඳවා ඇත.

සමාගමේ වෙබ් අඩවියේ පළකර ඇති නිල නිවේදනයට අනුව, 2026 මාර්තු සහ අප්‍රේල් සඳහා හදිසි ගල් අඟුරු අවශ්‍යතා සපුරාලීම සඳහා ප්‍රසම්පාදන ක්‍රියාවලිය ආරම්භ කර ඇත.

මෙම නිවේදනය පෙබරවාරි 25 වන දින සමාගමේ නිල වෙබ් අඩවියේ පළකර ඇත.

ඒ අනුව, 2026 මාර්තු-අප්‍රේල් කාලය සඳහා නොරොච්චෝලේ ගල්අඟුරු බලාගාරය වෙනුවෙන් ගල් අඟුරු මෙට්‍රික් ටොන් 300,000 ක් මිලදී ගැනීම සඳහා ප්‍රසම්පාදන කටයුතු සිදුකිරීමට අපේක්ෂා කෙරේ.

මෙම හදිසි ටෙන්ඩර් කැඳවීම සිදුවන්නේ රටට ප්‍රමිතියෙන් තොර ගල් අඟුරු ආනයනය කිරීම සම්බන්ධයෙන් ආන්දෝලනයක් මධ්‍යයේ ය.