එක්සත් අරාබි එමීර් රාජ්‍යයේ සේවා සපයන්නකුට කරන ලද ගෙවීම් සහ ඉන්දියාවේ චෙන්නායි හි පිහිටි එහි කාර්යාලයේ අරමුදල් අනිසි ලෙස භාවිත කිරීම සම්බන්ධ මූල්‍ය වංචා සිදුවීම් දෙකක් පිළිබඳව ශ්‍රී ලංකන් ගුවන් සේවය පැහැදිලි කර තිබේ.

ඊයේ නිකුත් කළ නිවේදනයක දැක්වෙන්නේ, ඩුබායි පදනම් කරගත් සේවා සපයන්නකු එක්සත් අරාබි එමීර් රාජ්‍යයේ ඩිරාම් 974,000 ක ගෙවීමක් ලැබී නොමැති බව ඔවුන්ට දැනුම්දුන් බවයි.

පරීක්ෂණයකින් පසු, සේවා සපයන්නාගේ විද්‍යුත් තැපැල් ගිණුම තෙවැනි පාර්ශවයක් විසින් හැක්කර ඇති බව සොයාගෙන ඇත.

වංචාකරුවන් බැංකු ගිණුම් විස්තර වෙනස් කර නිල විද්‍යුත් තැපැල් මාර්ග හරහා ව්‍යාජ ආධාරක ලේඛන යවා ඇති අතර, එහිදී ගුවන් සමාගම විශ්වාස කර ඇත්තේ, සැබෑ සමාගම සමඟ තමන් සෘජුවම කටයුතු කරන බවයි.

ශ්‍රී ලංකන් ගුවන් සේවය පවසන්නේ, එම ගිණුමට තවදුරටත් ගෙවීම් නතර කළ බවත්, අපරාධ විමර්ශන දෙපාර්තමේන්තුව (CID) ඇතුළුව එක්සත් අරාබි එමීර් රාජ්‍යයේ සහ ශ්‍රී ලංකාවේ බලධාරීන්ට මේ පිළිබඳව වාර්තා කළ බවත්ය.

ඒ අනුව රටවල් දෙකෙහිම විමර්ශන දැන් අඛණ්ඩව සිදුවෙමින් පවතී.

නිසි ලියකියවිලි සහ බලයලත් අත්සන් ලෙස පෙනෙන තොරතුරු මත පදනම්ව ගෙවීම සිදුකර ඇති බව ගුවන් සමාගම අවධාරණය කරයි.

ගුවන් සමාගමේ පාලනයෙන් බැහැර, සේවා සපයන්නාගේ විද්‍යුත් තැපැල් පද්ධතියේ ගැටළුවක් හේතුවෙන් වංචාව සිදුවී ඇති බැවින්, අතුරුදන් වූ අරමුදල් සඳහා තමන් වගකිව යුතු නොවන බව ගුවන් සමාගම ද ප්‍රකාශ කරයි.

තවත් සිදුවීමකදී, චෙන්නායි කාර්යාලයේ මූල්‍ය අංශයේ සේවය කරන ඉන්දියානු සේවකයන් කිහිපදෙනකු කාලයක සිට රුපියල් මිලියන 22ක් පමණ අනිසි ලෙස භාවිත කර ඇති බවට ගුවන් සමාගම හෙළිකරයි.

ඉන්වොයිසි, ගෙවීම් විස්තර සහ අත්සන් වංචනික ලෙස වෙනස් කිරීම සම්බන්ධයෙන් ඔවුන්ට චෝදනා එල්ල වී තිබේ.

ශ්‍රීලංකන් ගුවන් සේවය පවසන්නේ, මෙම කාරණය එහි කොළඹ ප්‍රධාන කාර්යාලය විසින් අනාවරණය කරගෙන ඇති අතර දැන් වැඩිදුර විමර්ශන සඳහා ඉන්දීය නීතිය ක්‍රියාත්මක කරන බලධාරීන්ට භාර දී ඇති බවයි.