June 16, 2026
ඉන්දීය නවක පිතිකරු වෛභව් සූර්යවංශී සමඟ පිටියේදී ඇති වූ උණුසුම් බහින්බස්වීමකින් පසුව, සමාජ මාධ්ය ඔස්සේ එල්ල වූ දැඩි අපහාසාත්මක ප්රතිචාර (Trolls) හේතුවෙන් ශ්රී ලංකා ‘ඒ’ කණ්ඩායමේ තරුණ ක්රීඩක විෂේන් හැළඹගේගේ ඉන්ස්ටග්රෑම් ගිණුම අවහිර වී ඇති බව වාර්තා වේ.
පසුගිය සඳුදා දඹුල්ලේදී පැවැති තුන්කොන් ක්රිකට් තරගාවලියේදී ඉන්දියා ‘ඒ’ කණ්ඩායම පරදවා ශ්රී ලංකා ‘ඒ’ කණ්ඩායම ලැබූ සුපිරි පන්දුවාර (Super Over) ජයග්රහණයෙන් පසු, මෙම ක්රීඩකයින් දෙදෙනා අතර ඇති වූ උණුසුම් වචන හුවමාරුවක වීඩියෝ දර්ශන සමාජ මාධ්ය තුළ දැඩි ලෙස සංසරණය වීමත් සමඟ විෂේන් කෙරෙහි බොහෝදෙනාගේ අවධානය යොමු විය.
මෙම සිදුවීමෙන් පසුව, විශේෂයෙන්ම ඉන්දියානු සමාජ මාධ්ය පරිශීලකයින් විශාල පිරිසක් විෂේන් හැළඹගේගේ ඉන්ස්ටග්රෑම් ගිණුම වෙත පැමිණ අපහාසාත්මක සහ බැනවැදුම් සහිත ප්රතිචාර දක්වා තිබේ. ඇතැම් පරිශීලකයින් විසින් ඔහුගේ පවුලේ සාමාජිකයන්ට ද මෙලෙස අන්තර්ජාලය ඔස්සේ හිරිහැර කර ඇති බව වාර්තා වේ.
ප්රකට ඉන්දීය ක්රිකට් ක්රීඩකයන් සම්බන්ධ වන මෙවැනි පිටියේ සිදුවීම්වලින් පසුව, ප්රතිවාදී කණ්ඩායම්වල ක්රීඩකයන්ට සමාජ මාධ්ය ඔස්සේ අපහාස කිරීම් සහ හිරිහැර කිරීම් අන්තර්ජාතික ක්රිකට් පිටිය තුළ වර්තමානයේ නිතර දැකිය හැකි සාමාන්ය තත්ත්වයක් බවට පත්ව ඇත.
අඟහරුවාදා වන විට විෂේන් හැළඹගේගේ ඉන්ස්ටග්රෑම් ගිණුමට ඇතුළු වීමට නොහැකි වී තිබූ අතර, වාර්තාවලින් පෙන්වාදෙන්නේ ගිණුමට එරෙහිව විශාල වශයෙන් පැමිණිලි සහ රිපෝට් ලැබීම හේතුවෙන් එය අවහිර වී ඇති බවයි. කෙසේවෙතත්, ගිණුම අක්රිය වීමට නිශ්චිත හේතුව ඉන්ස්ටග්රෑම් සමාගම හෝ අදාළ ක්රීඩකයා විසින් මෙතෙක් නිල වශයෙන් තහවුරු කර නොමැත.
තරඟ පිටියේ සිදුවන ගැටුම්කාරී තත්ත්වයන් මත පදනම්ව තරුණ ක්රීඩකයන් මෙලෙස අන්තර්ජාලය ඔස්සේ දරුණු ලෙස අපහාසයට ලක්වීම, සමාජ මාධ්යවල ඇති අඳුරු පැතිකඩ නැවත වරක් මනාව ඉස්මතු කිරීමට මෙම සිදුවීම හේතු වී තිබේ.
