කොළඹ නගරයට නව මුහුණුවරක් ලබා දීම සඳහා ශ්‍රී ලංකාව සිංගප්පූරුව පදනම් කරගත් සමාගමක් සමඟ සාකච්ඡා කරමින් සිටින බව වාර්තා වේ.

නාගරික සැලසුම් සකස් කරන සුර්බානා ජුරොන්ග් නැමති මෙම සිංගප්පුරු සමාගම විසින් සපයන ලද සැලසුම් සමඟ කොළඹ සුන්දර නගරයක් බවට පත්කිරීමේ දැක්ම දැනටමත් ක්‍රියාත්මක වෙමින් පවතින බව ජනාධිපති රනිල් වික්‍රමසිංහ පවසයි.

සුර්බානා ජුරොන්ග් යනු ගෝලීය නාගරික, යටිතල පහසුකම් සහ කළමනාකරණ සේවා උපදේශන සමාගමක් වන අතර, AETOS, Atelier Ten, B+H, KTP, Prostruct, RBG, SAA, Sino-Sun සහ SMEC ඇතුළු සාමාජික සමාගම් රාශියක් එය සතුව පවතී.

රටවල් 40 ක කාර්යාල 120ක් පමණ සමාගම සතුව ඇත.

වඩා හොඳ අනාගතයක් හැඩගස්වා ගැනීමට උපකාර කිරීම සඳහා ප්‍රගතිශීලී චින්තනය සහ නිර්මාණාත්මක අදහස් මගින් මෙහෙයවනු ලබන ගෘහ නිර්මාණ ශිල්පීන්, නිර්මාණකරුවන්, සැලසුම්කරුවන්, ඉංජිනේරුවන් සහ අනෙකුත් විශේෂඥයන් ඒවාට ඇතුළත් වන බව සුර්බානා ජුරොන්ග් වෙබ් අඩවියේ සඳහන් කර තිබේ.

කොළඹට අමතරව වෙරුගල් ආරුවේ සිට මඩකලපුව සහ ආරුගම්බේ ප්‍රදේශ දක්වා සංචාරක කලාපයක් නිර්මාණය කරමින් සංචාරක ව්‍යාපාරයේ වර්ධනයට දායක වෙමින් සුර්බානා ජුරොන්ග් සමාගම ද මෙරටට සක්‍රීයව සම්බන්ධ වී සිටින බව ජනාධිපති වික්‍රමසිංහ වැඩිදුරටත් පවසයි.

ජනාධිපති රනිල් වික්‍රමසිංහ මේ බව ප්‍රකාශ කළේ ඇමරිකානු ගෘහ නිර්මාණ ශිල්පීන්ගේ ආයතනය (AIA) සහ ශ්‍රී ලංකාවේ ඉතාලි තානාපති කාර්යාලය සහයෝගීතාවයෙන් ශ්‍රී ලංකාවේ Royal Institute of British Architects (RIBA) විසින් සංවිධානය කරන ලද ගෘහ නිර්මාණ ශිල්පය පිළිබඳ අන්තර්ජාතික සම්මන්ත්‍රණයකදීය.