පිටකොටුව සහ බම්බලපිටිය නව කතිරේසන් කෝවිල්වල 152 වැනි වාර්ෂික වේල් උත්සවයේ රථ පෙරහැර පැවැත්වෙන බැවින් ජූලි 28 සහ 31 යන දිනවල කොළඹ ප්‍රදේශ කිහිපයක රථවාහන තදබදයක් පැවතිය හැකි බව පොලිසිය රියදුරන්ට සහ මහජනතාවට දැනුම් දෙයි.

ඒ අනුව, වේල් පෙරහැර ජූලි 28 වැනි අඟහරුවාදා පෙරවරු 7.30ට පිටකොටුව චෙට්ටි වීදියේ පිහිටි කතිරේසන් කෝවිලෙන් ආරම්භ වී රාත්‍රී 8.30 වන විට බම්බලපිටිය නව කතිරේසන් කෝවිල වෙත ළඟාවීමට නියමිතය.

මෙම පෙරහැර චෙට්ටි වීදිය, ගෑස්පහ හන්දිය, ප්‍රධාන වීදිය, ඛාන් ඔරලෝසු කණුව, YMBA හන්දිය, බැස්ටියන් පාර, යෝර්ක් වීදිය, බාරොන් ජයතිලක මාවත, ජනාධිපති මාවත, ගාලු මුවදොර සහ ගාලු පාර ඔස්සේ බම්බලපිටිය දක්වා ගමන් කරනු ඇත.

පොලිසිය සඳහන් කරන්නේ සවස් කාලයේ එනම් පස්වරු 5.00ත් 7.00ත් අතර කාලය තුළ පෙරහැර කොල්ලුපිටිය සහ බම්බලපිටිය හරහා ගාලු පාරේ ගමන් කිරීමට නියමිත බවයි.

පසුව පස්වරු 7.00ට පමණ පැරණි කතිරේසන් කෝවිලටත්, රාත්‍රී 8.30ට පමණ බම්බලපිටිය නව කතිරේසන් කෝවිලටත් පෙරහැර ළඟා වනු ඇත.

නැවත හැරී එන පෙරහැර ජූලි 31 වැනි සිකුරාදා පෙරවරු 8.00ට බම්බලපිටිය නව කතිරේසන් කෝවිලෙන් ආරම්භ වී පිටකොටුව චෙට්ටි වීදියේ කතිරේසන් කෝවිල දෙසට ගමන් කිරීමට නියමිත අතර, එය මධ්‍යම රාත්‍රී 12.30ට පමණ අවසන් වීමට නියමිතය.

අදාළ වේලාවන්හිදී පෙරහැර ගමන් ගන්නා මාර්ගවල දැඩි රථවාහන තදබදයක් ඇතිවිය හැකි බැවින්, හැකි සෑම විටම විකල්ප මාර්ග භාවිත කරන ලෙස පොලිසිය රියදුරන්ගෙන් සහ මහජනතාවගෙන් ඉල්ලා සිටියි.