පාර්ලිමේන්තුවේදී ඇති වූ උණුසුම් වචන හුවමාරුවකින් පසු සමගි ජනබලවේගයේ මන්ත්‍රී ප්‍රසාද් සිරිවර්ධන ආණ්ඩු පක්ෂයේ පාර්ලිමේන්තු මන්ත්‍රී ලක්මාලි හේමචන්ද්‍රගෙන් සමාව ඉල්ලා තිබේ.

විවාදය අතරතුර තමා කළ ප්‍රකාශයක් හේතුවෙන් මන්ත්‍රීවරියට පෞද්ගලික වශයෙන් අපහාසයක් සිදුවූයේ නම් ඒ සම්බන්ධයෙන් කණගාටු වන බව සහ සමාව අයැද සිටින බව ද මන්ත්‍රීවරයා පවසයි.

තම දේශපාලනය පදනම්ව ඇත්තේ, සදාචාරාත්මක ප්‍රතිපත්තිමය තීන්දු මත මිසක පෞද්ගලිකව එල්ල කරන මතගැටුම්වලින් නොවන බව ඔහු අවධාරණය කළේය.

පාර්ලිමේන්තුවේ සිය කතාව අතරතුර මයික්‍රෆෝනය විසන්ධි වීම නිසා කලකිරීමෙන් එම ප්‍රකාශය කළ බව ද ඔහු පැවසීය.