කථානායක ජගත් වික්‍රමරත්නට එරෙහිව ඉදිරිපත් කිරීමට නියමිත විශ්වාසභංග යෝජනාව සම්බන්ධයෙන් අවසන් තීරණයක් ගැනීම සඳහා සමගි ජන බලවේගයේ පාර්ලිමේන්තු කණ්ඩායම හෙට විපක්ෂ නායක කාර්යාලයේදී රැස්වීමට නියමිත බව විපක්ෂයේ පාර්ලිමේන්තු මන්ත්‍රී අජිත් පී. පෙරේරා අද පැවසීය.

මෙම විශ්වාසභංග යෝජනාව පාර්ලිමේන්තුවට භාරදෙන දිනය පිළිබඳවද හෙට පැවැත්වෙන පාර්ලිමේන්තු කණ්ඩායම් රැස්වීමේදී තීරණය කරන බව හෙතෙම සඳහන් කළේය.

මන්ත්‍රීවරයාට අනුව, කථානායකවරයාගේ නිල නිවසේ ඉන්වෙන්ටරි ලේඛනයට අයත් භාණ්ඩ අතුරුදහන් වීම සම්බන්ධයෙන් පාර්ලිමේන්තු සේවකයන් පිරිසකට අනිසි බලපෑම් කළ බවට වන චෝදනාව ඇතුළුව, ඔහුට එරෙහිව චෝදනා 40 කට වැඩි ප්‍රමාණයක් එල්ල වී තිබේ.

කථානායකවරයා සම්බන්ධ දූෂණ චෝදනාවලට අදාළව පාර්ලිමේන්තු සේවකයන් කිහිපදෙනකු අල්ලස් හෝ දූෂණ චෝදනා විමර්ශන කොමිෂන් සභාව හමුවට කැඳවා ඇති බවත්, එම සේවකයන්ට කථානායකවරයා විසින් අනිසි බලපෑම් සිදුකර ඇති බවත් අජිත් පී. පෙරේරා වැඩිදුරටත් චෝදනා කළේය.