පසුගිය ගෝඨාභය රාජපක්ෂ පාලනය විසින් දියත් කරන ලද ආන්දෝලනාත්මක ව්‍යාපෘති සමඟින් වික්‍රමසිංහ-රාජපක්ෂ ආණ්ඩුවද අඛණ්ඩව ඉදිරියට යන බවට සමගි ජන බලවේගයේ හිටපු පාර්ලිමේන්තු මන්ත්‍රී මුජිබර් රහ්මාන් ඊයේ (18) චෝදනා කළේය.

හිටපු මන්ත්‍රීවරයා එසේ ප්‍රකාශ කළේ රෝහිත අබේගුණවර්ධන වරාය සහ නාවික ඇමැතිවරයා ලෙස කටයුතු කරන සමයේ ආරම්භ කළ ව්‍යාපෘතියක් වන ‘කොළඹ වරායේ දකුණු ආසියා ලොජිස්ටික් මධ්‍යස්ථානයේ ආයෝජනය’ පිළිබඳ ඉහළ පෙළේ ව්‍යාපෘතියක් ගැන සඳහන් කරමිනි.

2021 ජූලි 21 දිනැති ඇමැති මණ්ඩල සංදේශයකට අනුව, 2021 ජූලි 26 වන දින ඇමැති මණ්ඩලය මේ පිළිබඳව තීරණයක් ගෙන තිබේද යන්න දැනගැනීමට තමන් කැමති බව රහ්මාන් පැවසීය.

විපක්ෂය වෙනුවෙන් තමන් මේ සම්බන්ධයෙන් තොරතුරු දැනගැනීමේ අයිතිය පිළිබඳ පනත යටතේ ප්‍රශ්න මාලාවක් වරාය, නාවික හා ගුවන් සේවා අමාත්‍යාංශයට ඊයේ ඉදිරිපත් කළ බවද හිටපු මන්ත්‍රීවරයා සඳහන් කරයි.

කොළඹ වරායේ විෂය පථය තුළ පිහිටා ඇති අක්කර 14ක භූමි ප්‍රදේශයක් ශ්‍රී ලංකාවට බෙහෙවින් අහිතකර ලෙස චීන ව්‍යාපෘතියකට ලබා දීමට නියමිතව තිබිණි.

හිටපු මන්ත්‍රීවරයා පවසන්නේ මෙම ව්‍යාපෘතිය සඳහා වෙන්කර ඇති ඉඩම්වල තක්සේරුව සම්බන්ධයෙන් ඔවුන් දැඩි උනන්දුවක් දක්වන බවයි.

මෙම ව්‍යාපෘතිය සම්බන්ධයෙන් ජනාධිපතිවරයා වහාම තොරතුරු අනාවරණය කළයුතු බවද හෙතෙම වැඩිදුරටත් සඳහන් කරයි.