මහාපරිමාණ මත්ද්‍රව්‍ය ජාවාරම්කරුවකු යැයි කියන ශිරාන් බාසික් නමැත්තා ඩුබායිහිදී අත්අඩංගුවට ගෙන ඇති බවට වාර්තා වන සිදුවීම සම්බන්ධයෙන් මෙතෙක් කිසිදු නිල දැනුම්දීමක් ලැබී නොමැති බව මහජන ආරක්ෂක අමාත්‍ය ආනන්ද විජේපාල ප්‍රකාශ කළේය.

මේ පිළිබඳව අදහස් දක්වමින් මහජන ආරක්ෂක අමාත්‍යවරයා සඳහන් කළේ, ඒ සම්බන්ධයෙන් නිල නොවන තොරතුරු ලැබී තිබුණද, ආරක්ෂක අංශ මේ වන විටත් එම තත්ත්වය පිළිබඳව දැඩි අවධානයෙන් පසුවන බවයි.

පොලිසිය, විශේෂයෙන්ම අපරාධ පරීක්ෂණ දෙපාර්තමේන්තුව (CID) මේ පිළිබඳව සිදුවන වර්ධනයන් කෙරෙහි දැඩි අවධානයක් යොමු කරමින් සිටින බවද ඔහු පැවසීය.

මත්ද්‍රව්‍යවලට සම්බන්ධ අපරාධකරුවන් නීත්‍යානුකූල මාර්ගවලින් අත්අඩංගුවට ගැනීම සඳහා මේ වන විටත් රතු (Red notices) සහ නිල් (Blue notices) නිවේදන නිකුත් කර ඇති අතර, ඒ සඳහා වන උත්සාහයන් අඛණ්ඩව ක්‍රියාත්මක වන බවද අමාත්‍ය විජේපාල වැඩිදුරටත් සඳහන් කළේය.

සමාජ මාධ්‍ය ඔස්සේ විවිධ තොරතුරු සංසරණය වුවද, ශිරාන් බාසික් අත්අඩංගුවට ගැනීම සම්බන්ධයෙන් එක්සත් අරාබි එමීර් රාජ්‍යයෙන් (UAE) මෙතෙක් කිසිදු නිල තහවුරු කිරීමක් කර නොමැති බවද ඔහු පැවසීය.

ඉන්තර්ජතික පොලිසිය (Interpol) හරහා බලධාරීන් මේ වන විටත් විමර්ශන කටයුතු ඉදිරියටම කරගෙන යන බවත්, සැකකරුවන් නීතියේ රැහැනට හසුකර ගැනීම සඳහා අවශ්‍ය ඉදිරි පියවර ගන්නා බවත් අමාත්‍යවරයා වැඩිදුරටත් කියාසිටියේය.