හිටපු රාජ්‍ය අමාත්‍ය ශෂීන්ද්‍ර රාජපක්ෂ සැප්තැම්බර් 12 වැනි දින දක්වා තවදුරටත් රක්ෂිත බන්ධනාගාරගත කිරීමට කොළඹ මහේස්ත්‍රාත් අධිකරණය නියෝග කර තිබේ.

දූෂණ චෝදනා එල්ල වී ඇති රාජපක්ෂ වෙනුවෙන් ඉදිරිපත් කළ ඇප අයැදුම්පත ද කොළඹ මහේස්ත්‍රාත් අධිකරණය ප්‍රතික්ෂේප කර තිබේ.

කොළඹ ප්‍රධාන මහේස්ත්‍රාත් අසංක එස්. බෝදරගම නියෝග කර ඇත්තේ, හිටපු රාජ්‍ය අමාත්‍යවරයා නියමිත දිනය දක්වා රක්ෂිත බන්ධනාගාරගත කරන ලෙසයි.

අගෝස්තු 06 වැනි දින නුගේගොඩ පිහිටි ඔහුගේ නිවසේදී අල්ලස් හෝ දූෂණ චෝදනා විමර්ශන කොමිසම විසින් ශෂීන්ද්‍ර රාජපක්ෂ අත්අඩංගුවට ගන්නා ලදී.

2022 දී දිවයින පුරා පැවති විරෝධතා අතරතුර ගිනිතැබූ සෙවනගල-කිරිඉබ්බන් වැව ප්‍රදේශයේ රජයේ ඉඩමක හානියට පත් ගොඩනැගිල්ලක් සඳහා වෙනත් පුද්ගලයකු හරහා වන්දි ලබාගත් බව කියන සිද්ධියක් සම්බන්ධයෙන් ඔහු අත්අඩංගුවට ගෙන ඇත.

2022 මැයි 9 වැනි දින සෙවනගල-කිරිඉබ්බන් වැව ප්‍රදේශයේ ශ්‍රී ලංකා මහවැලි අධිකාරියට අයත් ඉඩමක නීතිවිරෝධී ලෙස ඉදිකරන ලද ගොඩනැගිල්ලක් ඇතුළු දේපළ කිහිපයකට 2022 මැයි 9 වැනි දින සිදු වූ අරගලයේදී හානි සිදු වූ බව අල්ලස් කොමිසම ප්‍රකාශ කළේය.

හානියට පත් දේපල සඳහා වන්දි ගෙවීමේ ක්‍රියාවලියේදී, එම දේපළ ශ්‍රී ලංකා මහවැලි අධිකාරියට අයත් බව හඳුනාගෙන ඇති අතර, එම නිසා වන්දි ගෙවීම ප්‍රතික්ෂේප කරන ලදී.

කෙසේවෙතත්, ශෂීන්ද්‍ර රාජපක්ෂ තම නිල බලය භාවිත කරමින්, තීරණය උල්ලංඝනය කරමින් වන්දි ලබාගැනීමට උත්සාහ කරමින්, හානි තක්සේරු කාර්යාලයේ ඇතැම් රජයේ නිලධාරීන්ට අනිසි බලපෑම් කළ බවට චෝදනා එල්ල වේ.

තවද, එම වන්දි ලබාගැනීම සම්බන්ධයෙන් දූෂණ වරදක් සිදුකිරීම සහ කුමන්ත්‍රණය කිරීම මෙන්ම මහවැලි අධිකාරියට අයත් රජයේ දේපළ නීතිවිරෝධී හා වංචනික ලෙස භාවිත කිරීම සම්බන්ධයෙන් ඔහුට චෝදනා එල්ල වී තිබේ.