මහරගම අපේක්ෂා රෝහලේ අලුතින් ස්ථාපනය කරන ලද CT සිමියුලේටර් යන්ත්‍රයේ මෘදුකාංග නොගැළපීමේ තාක්ෂණික දෝෂයක් මතුවීම හේතුවෙන්, විකිරණ ප්‍රතිකාර සැලසුම් කර ගැනීමට සිටින පිළිකා රෝගීන් 1,500 කට ආසන්න පිරිසකට ප්‍රතිකාර බරපතළ ලෙස ප්‍රමාද වී ඇති බව වාර්තා වී ඇත.

මේ සම්බන්ධයෙන් සෞඛ්‍ය අමාත්‍යාංශයේද දැඩි අවධානය යොමු වී තිබේ.

රෝහලේ පැරණි CT සිමියුලේටර් යන්ත්‍රය ඉවත් කරනු ලැබුවේ පසුගිය අප්‍රේල් 29 වැනිදාය.

නව යන්ත්‍රය සැප්තැම්බර් 7 වැනි දින රෝහල් කාර්ය මණ්ඩලය වෙත භාර දී තිබුණද, විකිරණ ප්‍රතිකාර සැලසුම් සඳහා අවශ්‍ය මෘදුකාංග සහ නව යන්ත්‍රය අතර පවතින නොගැළපීමක් නිසා එය තවමත් භාවිතයට ගැනීමට නොහැකි වී ඇති බව රජයේ විකිරණ විද්‍යා තාක්ෂණවේදීන්ගේ සංගමය විසින් පවසා තිබේ.

විකිරණ ප්‍රතිකාර ආරම්භ කිරීමට ප්‍රථම CT සිමියුලේටර් පරීක්ෂණයක් මඟින් ප්‍රතිකාර සැලසුම් කිරීම අත්‍යවශ්‍ය වන බැවින්, මෙම අසමත්වීම නිසා රෝගීන් දැඩි අසීරුතාවකට මුහුණ දී ඇත.

මෙම තත්ත්වය හමුවේ තාවකාලික පිළියමක් ලෙස රෝහලේ PET ස්කෑනර් යන්ත්‍රය මඟින් CT සිමියුලේටර් පරීක්ෂණ සිදු කිරීමට රෝහල පියවර ගෙන තිබේ.

එහෙත්, අවශ්‍ය විශේෂිත උපාංග සහ ධාරිතාව එහි නොමැති වීම නිසා සියලුම රෝගීන් සඳහා එය ආදේශකයක් කර ගැනීමට නොහැකි වී තිබේ.

විශේෂයෙන්ම පියයුරු පිළිකා රෝගීන් සඳහා PET ස්කෑනරය හරහා මෙම පරීක්ෂණය සිදුකිරීමට කිසිසේත් නොහැකි බව සඳහන් වේ.

රජයේ විකිරණ විද්‍යා තාක්ෂණවේදීන්ගේ සංගමයේ සභාපති චානක ධර්මවික්‍රම පෙන්වා දී ඇත්තේ, මෙම ප්‍රමාදය නිසා පිළිකා තත්ත්වය තවදුරටත් වර්ධනය වීමේ අවදානමක් ඇති බවයි.

අප්‍රේල් මස දිනකට රෝගීන් 300 කට පමණ විකිරණ ප්‍රතිකාර ලබාදුන්නද, රේඛීය ත්වරක යන්ත්‍ර හතරක් තවදුරටත් ක්‍රියාත්මක වුවද, වර්තමානය වන විට එම දෛනික ප්‍රතිකාර ලබන ප්‍රමාණය 200 දක්වා පහළ ගොස් තිබේ.

රජයේ සේවාවෙන් මෙම ප්‍රතිකාරය ලබාගැනීමට ඇති ප්‍රමාදය හේතුවෙන් පෞද්ගලික අංශය වෙත යොමුවීමට සිදුවුවහොත්, එක් රෝගියෙකුට රුපියල් ලක්ෂ 5 සිට මිලියන 2 දක්වා දැවැන්ත මුදලක් වැය කිරීමට සිදුවන බවත්, එය සාමාන්‍ය රෝගීන්ට දැරිය නොහැකි බරක් බවත් සංගමය වැඩිදුරටත් පෙන්වා දෙයි.

සෞඛ්‍ය අමාත්‍යාංශයේ ජ්‍යෙෂ්ඨ නිලධාරීන් ප්‍රකාශ කර ඇත්තේ මෙම ගැටළුව මේ වන විට දැඩි සමාලෝචනයට ලක්කර ඇති බවයි.(Daily Mirror)