වාකරේ ප්‍රාදේශීය සභාවේ බලය ස්ථාපිත කිරීමට දෙමළ මක්කල් විඩුතලෙයි පුලිකල් හෙවත් TMVP පක්ෂයට උදව් කිරීම සම්බන්ධයෙන් මඩකලපුව දිස්ත්‍රික් පාර්ලිමේන්තු මන්ත්‍රී ශානකියන් රාසමානික්කම් ජාතික ජන බලවේගය විවේචනය කර තිබේ.

TMVP පක්ෂයේ ප්‍රධානියා වන්නේ හිටපු රාජ්‍ය අමාත්‍ය සිවනේසතුරෙයි චන්ද්‍රකාන්තන් හෙවත් ‘පිල්ලෙයාන්’ වන අතර ඔහු 2006 දී නැගෙනහිර පළාතේ විශ්වවිද්‍යාල උපකුලපතිවරයකු පැහැරගෙන ගොස් අතුරුදහන් කිරීම සම්බන්ධයෙන් දැනට රඳවාගෙන සිටී.

‘X’ සමාජ මාධ්‍ය වේදිකාවේ සටහනක් තබමින්, වාකරේ ප්‍රාදේශීය සභාව සුරක්ෂිත කිරීම සඳහා පිල්ලයාන්ගේ පක්ෂයට සහාය දුන් බවට ජාතික ජන බලවේගයට පාර්ලිමේන්තු මන්ත්‍රී ශානකියන් රාසමානික්කම් චෝදනා කළේය.

“වාකරේ කවුන්සිලයේ අද සිදුවීම්වලින් පැහැදිලි වී ඇත්තේ ජාතික ජන බලවේගය සතුව ස්ථාවර මූලධර්ම හෝ ප්‍රතිපත්ති නොමැති බවයි. ජාතික ජන බලවේගයේ සාමාජිකයන් පිල්ලයාන්ගේ TMVP පක්ෂයේ අපේක්ෂකයාට සහාය දුන් අතර, ITAK අපේක්ෂකයා පරාජය කරමින් සභාපති ධුරය ලබා ගැනීමට ඔවුන්ට උදව් කර තිබෙනවා,” යනුවෙන් පාර්ලිමේන්තු මන්ත්‍රී ශානකියන් පැවසීය.