එංගලන්තයට එරෙහිව ලැබූ තවත් දැවැන්ත පරාජයෙන් අනතුරුව, ශ්‍රී ලංකා 20යි20 ක්‍රිකට් කණ්ඩායමේ ක්‍රීඩක තේරීම්, ස්ථාවර භාවය සහ ශාරීරික යෝග්‍යතාවය දැඩි ලෙස ප්‍රශ්න කිරීමට හිටපු නායක කුමාර් සංගක්කාර කටයුතු කර තිබේ. ඔහු පෙන්වා දෙන්නේ ශ්‍රී ලංකාව අපේක්ෂා කරන මට්ටමේ 20යි20 කණ්ඩායමක් බවට පත්වීමට තවමත් බොහෝ දුර යා යුතුව ඇති බවයි.

තරගයෙන් අනතුරුව පැවැත්වුණු විචාරාත්මක වැඩසටහනකට එක්වෙමින් සංගක්කාර කියා සිටියේ, එංගලන්තයේ ආධිපත්‍යය හමුවේ කණ්ඩායම් දෙක අතර පවතින පරතරය මනාව පැහැදිලි වූ බවයි. විශේෂයෙන්ම පිතිකරණය, ශාරීරික යෝග්‍යතාවය සහ තරග උපක්‍රම භාවිතය යන ක්ෂේත්‍රවල විශාල වෙනසක් දක්නට ලැබුණු බව ඔහු සඳහන් කළේය.

සෙසු විස්තර විචාරක නසාර් හුසේන්ගේ අදහසට එකඟ වෙමින් සංගක්කාර පැවසුවේ කණ්ඩායම් දෙක අතර විශාල පරතරයක් තිබෙන බවය.

ශ්‍රී ලංකාවේ හොඳම දඟපන්දු යවන්නා ලෙස තමන් දකින මහීෂ් තීක්ෂණ කණ්ඩායමෙන් ඉවත් කර වෙනත් පන්දු යැවීමේ විකල්පයකට යාම සහ කමිල් මිෂාර අංක 3 ස්ථානයට නම් කිරීමට ගත් තීරණයද සංගක්කාරගේ ප්‍රශ්න කිරීමට ලක්විය.

“තීරණ ගැනීමේදී යම් ස්ථාවර භාවයක් තියෙන්න ඕනේ. ඔබ කණ්ඩායමේ හොඳම ක්‍රීඩකයන් කෙරෙහි විශ්වාසය තබන්න ඕනේ. ක්‍රීඩකයන් නිවැරදිව හඳුනාගෙන, ඔවුන් විශ්වාස කර, ඔවුන් දියුණු විය යුතු ක්ෂේත්‍ර මොනවාද කියලා තේරුම් ගන්න ඕනේ,” යනුවෙන් ඔහු පැවසීය.

එමෙන්ම ශාරීරික යෝග්‍යතාවය සහ ශක්තිය වර්ධනය කර ගැනීම වහාම සිදුවිය යුතු ප්‍රධාන ක්ෂේත්‍ර ලෙස පෙන්වා දුන් හිටපු නායකයා, පිතිකරණ තාක්ෂණයට හානියක් නොවන පරිදි ප්‍රබල ලෙස පන්දුවට පහරදීමේ හැකියාව ශ්‍රී ලංකා ක්‍රීඩකයන් වර්ධනය කරගත යුතු බව අවධාරණය කළේය.

තරගයේ ස්වභාවය වටහා ගැනීම, පන්දු යැවීමේදී තියුණු ලෙස සිතා කටයුතු කිරීම සහ ඊට ගැලපෙන ලෙස පන්දු රකින්නන් පන්දු යවන්නාට අනුව ස්ථානගත කිරීමේ වැදගත්කමද ඔහු පෙන්වා දුන්නේය.