නව පොලිස්පතිවරයකු පත්කිරීමේ බරපතළ ගැටලුවක් පවතින බවත් කථානායකවරයා සහ අගවිනිසුරුවරයා සාකච්ඡා කර මෙම ගැටලු විසඳා ගන්නා බවත් පවසමින් ආණ්ඩුව මැතිවරණ කල්දැමීමට අලුත් කතා ගොතමින් සිටින බවට විපක්ෂ නායක සජිත් ප්‍රේමදාස මන්ත්‍රීවරයා චෝදනා කරයි.

ශ්‍රේෂ්ඨාධිකරණය තීන්දුවක් ලබාදී ඇති බැවින් කිසිවකුට ඒ පිළිබඳ කතාකිරීමට හෝ සාකච්ඡා කිරීමට නොහැකි බව පෙන්වා දෙන විපක්ෂ නායකවරයා, කථානායකවරයා විනිසුරුවරුන් සමඟ ඒ පිළිබඳ සාකච්ඡා කිරීම සදාචාරාත්මක නොවන බවද ප්‍රකාශ කළේය.

ජනාධිපතිවරයා උප්පරවැට්ටිවලින් තම ජනාධිපති ධුරය රැකගැනීමට උත්සාහ කරන බවට ද විපක්ෂ නායකවරයා චෝදනා කළේය.

රටේ උත්තරීතර නීතිය සමඟ සෙල්ලම් නොකර ශ්‍රේෂ්ඨාධිකරණයේ තීන්දුව ක්‍රියාත්මක කරන ලෙස ජනාධිපතිවරයා, අගමැතිවරයා, කථානායකවරයා ඇතුළු ඇමැති මණ්ඩලයෙන් ඔහු වැඩිදුරටත් ඉල්ලා සිටියි.

ජනාධිපතිවරයා මුලින්ද උප්පරවැට්ටියක් දැමීමට උත්සාහ කළ බව ප්‍රකාශ කළ විපක්ෂ නායකවරයා, තමා ජනාධිපති අපේක්ෂකයකු බැවින් පොලිස්පති පත්කිරීමට මැදිහත් විය නොහැකි බව ජනාධිපතිවරයා ප්‍රකාශ කළද ආණ්ඩුක්‍රම ව්‍යවස්ථාවේ එවැන්නක් නොමැති බවත් ප්‍රකාශ කළේය.

ආණ්ඩුක්‍රම ව්‍යවස්ථාවේ ජනාධිපතිවරයාගේ වගකීම් ඇති බවත්, ඒවා ක්‍රියාත්මක නොකරන්නේ නම් තමන් ඉල්ලා අස්වී වෙනත් ජනාධිපතිවරයකුට එය කිරීමට පාර කැපිය යුතු බවත් විපක්ෂ නායකවරයා පෙන්වා දුන්නේය.

පාර්ලිමේන්තුව නීත්‍යනුකූල බව ප්‍රකාශ කරද්දී පොලිස්පතිවරයා පත්කිරීම නීතිවිරෝධී බව ශ්‍රේෂ්ඨාධිකරණය ප්‍රකාශ කර ඇති බවට ජනාධිපතිවරයා ප්‍රකාශ කිරීමෙන් අනතුරුව සැප්තැම්බර් 21 මැතිවරණ දිනය ලෙස නියම කර ඇති බැවින් මෙම තත්ත්වය බරපතළ ගැටලුවක් විය හැකි බවද ඔහු ප්‍රකාශ කළේය.

“ඉතින් මම මේ ගැන මැතිවරණ කොමිසමේ සභාපති, අපේ මහානායක හාමුදුරුවරු ඇතුළු නායකයන් සමඟ සාකච්ඡා කළා. මේ ප්‍රශ්නයට අපි විසඳුම් සෙවිය යුතුයි කියලා ඒ හැමෝම එකඟ වුණා. ඒක මේ විදියට කඩා වැටෙන්න දෙන්න බෑ මොකද පීඩාවට පත් වෙන්නේ ජනතාව.
මම මේ ප්‍රශ්නය බලන්නේ වෙනස් දෘෂ්ටිකෝණයකින්. පොලිස්පතිවරයා පත් කිරීම හෝ ආණ්ඩුක්‍රම ව්‍යවස්ථා සම්පාදක රැස්වීම කෙරෙහි අවධානය යොමුකරනවා වෙනුවට, මැතිවරණ ජනතා පරමාධිපත්‍යයේ කොටසක් බව සඳහන් වන ආණ්ඩුක්‍රම ව්‍යවස්ථාවේ 4 වැනි වගන්තිය වෙත යොමුවෙනවා. අපි මේ ස්වෛරීභාවයට ගරු කළ යුතුයි. ආණ්ඩුක්‍රම ව්‍යවස්ථාවේ 104 වැනි වගන්තියට අනුව රට තුළ නිදහස් හා ස්වාධීන මැතිවරණ පැවැත්වීම සඳහා මැතිවරණ කොමිසමට බලය තිබෙනවා. මැතිවරණය පැවැත්වීමේ කාලසීමාව ජූලි 17 වැනිදා ආරම්භ වුණා. මෙම නිදහස් හා ස්වාධීන මැතිවරණය පැවැත්වීම සඳහා මැතිවරණ කොමිසමට පූර්ණ සහාය ලබා දීම අපගේ පරම යුතුකමයි’’ යනුවෙන් ජනාධිපතිවරයා එහිදී පැවසූ බව ජනාධිපති මාධ්‍ය අංශය පවසා තිබිණි.

“මනුෂ නානායක්කාර ඇමැතිවරයා මැතිවරණ කොමසාරිස්වරයාගෙන් මගේ ඡායාරූපයක් මේ වේදිකාවට දාන්න පුළුවන්ද කියලා ඇහුවා. ඒක අයින් කරන්න කියලා ඉල්ලුවා. මෙය මට ගැටලුවක් නෙවෙයි. මේ ගැන සාකච්ඡා, වාද විවාද කරන්න ඕන. කෙසේවෙතත් මේ සම්බන්ධයෙන් මැතිවරණ කොමිසමෙන් විමසීමට ශ්‍රේෂ්ඨාධිකරණයට ද යුතුකමක් තිබුණා. ආණ්ඩුක්‍රම ව්‍යවස්ථාවේ 104 වැනි ව්‍යවස්ථාව අනුව මැතිවරණ කොමිසමට පොලිස් නිලධාරීන්ගෙන් ඉල්ලා සිටිය යුත්තේ නියෝජ්‍ය පොලිස්පතිවරයාගෙන් නොව පොලිස්පතිවරයා හරහායි. එය පොලිස්පතිවරයාගෙන් පැමිණිය යුතුයි.” යනුවෙන්ද වැඩිදුරටත් අදහස් දැක්වූ ජනාධිපතිවරයා ප්‍රකාශ කර තිබිණි.

“පොලිස්පතිවරයකු නොමැතිව අවශ්‍ය නිලධාරීන් ආරක්‍ෂා කරන්නේ කොහොමද? මේ සතියේ අවශ්‍ය පොලිස් නිලධාරීන් සංඛ්‍යාව ඉල්ලා සිටිය යුතුයි. ප්‍රමාද වුණොත් එය කළ නොහැකියි. මැතිවරණය පැවැත්විය නොහැකියි. එමනිසා මෙම ප්‍රශ්නය ඉතා වැදගත්. එමනිසා මේ කාරණය සම්බන්ධයෙන් මැතිවරණ කොමිසමෙන් උපදෙස් ලබාගැනීම ශ්‍රේෂ්ඨාධිකරණයේ මූලික යුතුකම වනවා. ඒ වගේම පාර්ලිමේන්තුවත් මේ ප්‍රශ්න ගැන මැතිවරණ කොමිසමෙන් අහලා තීන්දුවක් දෙන්න තිබුණා. එසේ කිරීමට අපොහොසත් වීම නිසා ගැටලුවක් නිර්මාණය වෙලා. මැතිවරණය කල්දැමීමට මා කැමති නැහැ. සැප්තැම්බර් 21 න් ඔබ්බට එය ප්‍රමාද කිරීමට මම සූදානම් නැහැ. මෙම මැතිවරණය සැලසුම් කළ පරිදි පැවැත්වීමට මම අධිෂ්ඨාන කරගෙන ඉන්නේ. ඔබ කැමති කෙනෙකුට ඡන්දය දෙන්න; එය ගැටලුවක් නෙවෙයි, එය ඔබගේ අයිතියයි, ”යනුවෙන්ද ජනාධිපතිවරයා පැවසීය.

“අපි දැන්වත් උසාවි යන එක නවත්තලා විසඳුමක් හොයන්න ඕන. මෙම තත්ත්වය සමනය කරනවාද නැතිනම් එය පුපුරා යෑමට ඉඩ දෙනවාද යන්න අප තීරණය කළ යුතුයි. එය පුපුරවා හැරීමට අපට ඉඩදිය නොහැකියි. එය අක්‍රීය කිරීමට අවශ්‍යයි. පාර්ලිමේන්තුවත් ශ්‍රේෂ්ඨාධිකරණයත් ඒ අනුව කටයුතු කළ යුතුයි.” යනුවෙන්ද ජනාධිපති රනිල් වික්‍රමසිංහ එහිදී වැඩිදුරටත් සඳහන් කළේය.

“ඒ නිසා කථානායකතුමයි අගවිනිසුරුතුමයි දෙන්නම සාකච්ඡා කරලා මේ ප්‍රශ්නය විසඳගන්න කියලා මම ඉල්ලනවා. මම උදේ කථානායකට කතා කළා, ඔහු නීතිපතිවරයාට ලිපියක් යවා ඇති බව සඳහන් කර අගවිනිසුරුවරයා සමඟ කතා කිරීමට සූදානම් බව කිව්වා. මේ ගැන සාකච්ඡා කරන්න කියලා මම අගවිනිසුරුතුමාටත් දන්වන්නම්. අපි මේ සතිය ඇතුළත මේ ප්‍රශ්නය විසඳිය යුතුයි.” යනුවෙන් ජනාධිපතිවරයා ප්‍රකාශ කර තිබිණි.

“ආණ්ඩුක්‍රම ව්‍යවස්ථාවේ 4 වැනි වගන්තිය යටතේ රටේ ආරක්‍ෂාව සම්බන්ධයෙන් ජනාධිපතිවරයා වගකිව යුතුයි. රට ආරක්‍ෂා කිරීමට අපොහොසත් වූ ජනාධිපති මෛත්‍රීපාල සිරිසේනට ශ්‍රේෂ්ඨාධිකරණය දඬුවම් කළා. රටේ ආරක්ෂාව තහවුරු කිරීමට පොලිසිය අවශ්‍ය වන අතර බුද්ධි අංශය සහ විශේෂ කාර්ය බළකාය ක්‍රියාත්මක විය යුතුයි. මේ හැකියාවන් නැති වුණොත් මොකද වෙන්නේ?” ඔහු වැඩිදුරටත් පැවසීය.