ශ්‍රී ලංකාවේ හෙල්ල විසි කිරීමේ නැගී එන තරුවක් වන රුමේෂ් තරංග පසුගිය සෙනසුරාදා මහින්ද රාජපක්ෂ ක්‍රීඩාංගණයේ පැවති චැම්පියන්ස් ජවන හා පිටිය තරගාවලියේදී මීටර් 89.37ක දුරක් විසි කරමින් නව ජාතික වාර්තාවක් පිහිටුවීමට සමත්විය.

22 හැවිරිදි ඔහු කැපී පෙනෙන හැකියාවන් පෙන්නුම් කළ ආකර්ෂණීය විසි කිරීම් මාලාවකින් පසුව, අවසන් උත්සාහයේදී වාර්තාගත විසි කිරීම සිදු කළේය.

ඔහු මීටර් 78.39ක දුරකින් විසි කිරීම් මාලාව ආරම්භ කළ අතර පසුව මීටර් 83.35, මීටර් 83.68, මීටර් 84.33 සහ මීටර් 84.62ක දුරක් විසි කරමින් සිව් වතාවක් මීටර් 83 සීමාව සම්පූර්ණ කිරීමට සමත් විය.

ඔහුගේ හොඳම විසි කිරීම මීටර් 89.37ක් වූ අතර, එය ඔහුගේම පෙර ජාතික වාර්තාව වන මීටර් 86.50ක වාර්තාව අභිබවා යෑමකි.

කෙසේවෙතත් තවමත් එය අනුමත කිරීමට යටත්ය.

මෙම දස්කම තරංග ලෝක සෘතුමය ශ්‍රේණිගත කිරීම්වල ඉහළට ගෙනයන අතර, පෙබරවාරි මාසයේදී ඕස්ට්‍රේලියාවේදී වාර්තා කරන ලද මීටර් 83.07ක දුරක් වැඩි දියුණු කිරීමකි.

මෑත මාසවලදී ඔහුගේ ස්ථාවර ප්‍රගතිය මෙම වාරයේ ලෝකයේ ප්‍රමුඛ හෙල්ල විසි කරන්නකු ලෙස ඔහුගේ ස්ථානය ශක්තිමත් කර ඇත.

තරංග ප්‍රථම වරට පසුගිය වසරේ ලෝක ශූරතාවලියේදී අවසන් මහා තරඟයට පිවිසීමෙන් ප්‍රධාන මාතෘකාවක් බවට පත් වූ අතර, සුසන්තිකා ජයසිංහ මීටර් 200 ඉසව්වෙන් ලෝකඩ පදක්කමක් දිනා ගැනීමෙන් පසු වසර 19කට පසු ලෝක ශූරතාවලියේ අවසන් මහා තරඟයකට පැමිණි පළමු ශ්‍රී ලාංකික ජවන හා පිටිය ක්‍රීඩකයා බවට පත්විය.

ටෝකියෝ ලෝක ශූරතාවලියේදී, ඔලිම්පික් ශූර නීරාජ් චොප්රා සහ අර්ෂාඩ් නදීම් ඇතුළු ඉහළම තරඟකරුවන් කිහිප දෙනෙකු අභිබවා තරංග හත්වැනි ස්ථානයට පත්විය.

ටෝනි ප්‍රසන්න විසින් පුහුණුව ලබාදෙන, ශාන්ත පීතර විද්‍යාලයේ හිටපු ක්‍රීඩකයකු වන තරංග අන්තර්ජාතික වේදිකාවේ ඔහුගේ ස්ථාවර දස්කම් සමඟින් ශක්තිමත් හැකියාවන් අඛණ්ඩව පෙන්නුම් කරමින් සිටී.