ශ්‍රේෂ්ඨාධිකරණ තීන්දු කෙරෙහි රජය ගරු කරන බවත්, අධිකරණ ක්‍රියාදාමයට කිසිදු ලෙසකින් අතපෙවීමක් නොකරන බවත් අවධාරණය කරමින්, බන්ධනාගාරගත කර සිටින පූජ්‍ය ගලගොඩඅත්තේ ඥානසාර හිමියන්ට ජනාධිපති සමාව ලබා දීම ජනාධිපති අනුර කුමාර දිසානායක විසින් ප්‍රායෝගිකව ප්‍රතික්ෂේප කළේය.

අද (ඔක්තෝබර් 18) බදුල්ලේ පැවැති ජාතික ජන බලවේගයේ කාන්තා රැලිය අමතමින් ජනාධිපතිවරයා පැවසුවේ, අධිකරණයේ අවසාන තීරණ රජය විසින් පිළිගන්නා බවත්, එම තීන්දු ආපසු හැරවීමට විධායකය පියවර ගනු ඇතැයි කිසිවෙකුත් නොසිතිය යුතු බවත්ය.

ජනාධිපතිවරයා එහිදී ඥානසාර හිමියන්ගේ නම හෝ උන්වහන්සේගේ සිරදඬුවම පිළිබඳව සෘජුව සඳහන් නොකළද, උන්වහන්සේගේ සිරදඬුවම සහ ජනාධිපති සමාව ඉල්ලා සිටීමේ සිදුවීම මුල්කර ගනිමින් ඇති වී තිබෙන ආන්දෝලනාත්මක තත්ත්වය ඉලක්ක කරගනිමින් මෙම අදහස් පළකළ බව පෙනීයයි.

නීති සම්පාදනය කිරීම පාර්ලිමේන්තුවේ වගකීම වන අතර, නීතිය බලාත්මක කිරීම සහ විමර්ශන පවත්වාගෙන යාම පොලිසිය, අපරාධ විමර්ශන දෙපාර්තමේන්තුව සහ අල්ලස් හෝ දූෂණ චෝදනා විමර්ශන කොමිෂන් සභාව වැනි ආයතනවල වගකීම වන බව ජනාධිපතිවරයා පැහැදිලි කළේය.

කෙසේවෙතත්, නීතිය අර්ථ නිරූපණය කිරීමේ සහ ක්‍රියාත්මක කිරීමේ අවසාන බලය පවතින්නේ අධිකරණය, විශේෂයෙන්ම ශ්‍රේෂ්ඨාධිකරණය සතුව බව ඔහු අවධාරණය කළේය.

“ශ්‍රේෂ්ඨාධිකරණය තීන්දුවක් දුන්නාම සමහර අය කෑගහන්න පටන් ගන්නවා ඒක ඉවත් කරන්න කියලා. එහෙම නීති එක්ක රටක් පාලනය කරන්නේ කොහොමද?” යැයි ජනාධිපතිවරයා ප්‍රශ්න කළේය.

අධිකරණය ලබා දෙන තීන්දු නීතියේ නිල තීරණය ලෙස රජය පිළිගන්නා අතර, තමන් ඊට යටත්ව කටයුතු කරන බවද ඔහු පැවසීය.

“අධිකරණය ලබාදෙන තීරණවලට අපි යටත් වෙනවා. ඊට එහා දෙයක් කවුරුත් අපෙන් බලාපොරොත්තු වෙන්න එපා,” යැයි ඔහු ප්‍රකාශ කළේය.

ඥානසාර හිමියන් නිදහස් කරන ලෙස භික්ෂූන් වහන්සේලා කිහිපනමක් සහ විපක්ෂයේ දේශපාලනඥයන් පිරිසක් විසින් දැඩි බලපෑම් එල්ල කරමින් සිටින පසුබිමක ජනාධිපතිවරයා මෙම අදහස් පළකළේය.

2019 වසරේදී හිටපු ජනාධිපති මෛත්‍රීපාල සිරිසේන විසින් ඥානසාර හිමියන්ට ලබාදුන් ජනාධිපති සමාව නීතිවිරෝධී බව ප්‍රකාශ කරමින්, ශ්‍රේෂ්ඨාධිකරණය විසින් සැප්තැම්බර් 10 වැනි දින එම සමාව අහෝසි කරන ලදී.

එම තීන්දුවෙන් පසුව, අධිකරණයට අපහාස කිරීම සම්බන්ධයෙන් උන්වහන්සේට නියම වූ වසර හයක සිරදඬුවම ක්‍රියාත්මක කරන ලෙස අභියාචනාධිකරණය ඔක්තෝබර් 05 වැනි දින නියෝග කළේය.

මෙම තීරණයත් සමඟ උන්වහන්සේ නිදහස් කරන ලෙස ඉල්ලමින් විරෝධතා ආරම්භ වූ අතර, කොළඹ පැවැති භික්ෂු විරෝධතාවද ඊට ඇතුළත් විය.

නව ජනාධිපති සමාවක් ලබාදීම සම්බන්ධයෙන් කෙළින්ම යමක් ප්‍රකාශ නොකළද, මෙම ගැටලුවට තමන් මැදිහත් නොවන බවට ජනාධිපතිවරයා ලබාදුන් පැහැදිලිම ප්‍රසිද්ධ ඉඟිය මෙය වේ.

මීට අමතරව, ජනාධිපතිවරයා ඥානසාර හිමියන්ට සමාව ලබානොදෙන බවත්, නීතිය අභිබවා යාමට කෙරෙන බලපෑම්වලට යටත් නොවන බවත් රජයේ ආරංචි මාර්ග සඳහන් කර ඇත.

නීති පද්ධතියට හානි කිරීමට දරන උත්සාහයන් පිළිබඳවද අවවාද කළ ජනාධිපතිවරයා, දරුවන්ගේ සුරක්ෂිත අනාගතයක් වෙනුවෙන් සැමට නීතිය එක ලෙස ක්‍රියාත්මක වන රටක් අත්‍යවශ්‍ය බව වැඩිදුරටත් පැවසීය.