ශ්‍රීලන්කන් ගුවන් සේවය ඇතුළු ගුවන් සමාගම් හයක් මේ වන විට සිවිල් ගුවන් සේවා අධිකාරියට රුපියල් බිලියන 27.6ක ගුවන් ගමන් බද්ද ගෙවීම පැහැර හැර ඇති බව වරාය හා සිවිල් ගුවන් සේවා නියෝජ්‍ය අමාත්‍ය ජනිත රුවන් කොඩිතුවක්කු අද පැවසීය.

ගුවන් සේවා හය අතරින් ශ්‍රීලන්කන් ගුවන් සේවය රුපියල් බිලියන 24.6ක් පැහැර හැර ඇති බව ඔහු පාර්ලිමේන්තුවට පැවසීය.

එයාර් ඒෂියා බර්හාඩ් රුපියල් මිලියන 88ක්, ඒරොෆ්ලොට් රෂියා රුපියල් මිලියන 508ක්, එයාර් ඉන්දියා රුපියල් මිලියන 57ක්, තායි එයාර් ඒෂියා රුපියල් මිලියන 221ක් සහ ෆිට්ස් ඒවියේෂන් රුපියල් මිලියන 2,126ක් පැහැර හැර ඇති බව නියෝජ්‍ය අමාත්‍යවරයා පැවසීය.

සමගි ජන බලවේගයේ පාර්ලිමේන්තු මන්ත්‍රී කිංග්ස් නෙල්සන්ගේ ප්‍රශ්නයකට පිළිතුරු දෙමින් ඔහු සඳහන් කළේ, සිවිල් ගුවන් සේවා අධිකාරිය හිඟ බදු අයකර ගැනීමට පියවර ගෙන ඇති අතර මේ සම්බන්ධයෙන් ගුවන් සමාගම්වලට විද්‍යුත් තැපෑලෙන් සහ ලිඛිතව දැනුම් දී ඇති බවයි.

අදාළ ගුවන් සමාගම්වල බැංකු ඇපකර අහෝසි කර මුදලින් කොටසක් අයකර ගැනීමට කටයුතු කර ඇති බවත්, ඉතිරි මුදල් අයකර ගැනීමට සිවිල් ගුවන් සේවා අධිකාරියට නීතිමය විධිවිධාන නොමැති බවත් නියෝජ්‍ය අමාත්‍යවරයා පැවසීය.

“ගුවන් සමාගම්වලට එරෙහිව මුදල් අයකර ගැනීම සඳහා නීතිමය පියවර ගැනීමට කැබිනට් පත්‍රිකාවක් ඉදිරිපත් කිරීමට අපි සැලසුම් කරනවා,” යැයි ඔහු පැවසීය.