ශ්‍රී ලංකාවේ සමස්ත ජාතික ප්‍රතිපත්ති රාමුව වඩාත් පැහැදිලි මාවතකට අවතීර්ණ කරමින්, වෙළඳ හා ආයෝජන කටයුතු කඩිනම් කිරීම සඳහා වන ආර්ථික ප්‍රතිසංස්කරණ රැසක් මේ වසර අවසන් වීමට පෙර ක්‍රියාත්මක කරන බව කර්මාන්ත හා ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ පැවැසීය.

පසුගිය වසරට සාපේක්ෂව මෙවර ප්‍රතිපත්තිමය මට්ටමින් සුවිශේෂී වෙනස්කම් රැසක් හඳුන්වා දීමට රජය සූදානම් වන අතර, විශේෂයෙන්ම මෙරට තොරතුරු තාක්ෂණ (IT) සහ නිෂ්පාදන ක්ෂේත්‍රයන්හි පවතින බාධක ඉවත් කිරීම කෙරෙහි රජයේ දැඩි අවධානය යොමුව ඇත.

පාත්ෆයින්ඩර් ආයතනය පවත්වන ලද තානාපති වටමේස සාකච්ඡාවට අද(05) එක්වෙමින් නියෝජ්‍ය අමාත්‍යවරයා පෙන්වාදුන්නේ, වත්මන් නීතිමය සහ නියාමන සීමාවන් හේතුවෙන් මෙරට තොරතුරු තාක්ෂණ ක්ෂේත්‍රයට අත්‍යවශ්‍ය වන ව්‍යවසාය ප්‍රාග්ධන අරමුදල් (Venture Capital Funds) සහ දේවදූත ආයෝජන අරමුදල් (Angel Investment Funds) ආකර්ෂණය කර ගැනීමට මෙතෙක් බාධා මතුව තිබූ බවයි.

කෙසේවෙතත්, මෙම වසර අවසන් වීමට පෙර එම සීමාවන් ඉවත් කර ආයෝජන සඳහා මගපෑදීමට රජය බලාපොරොත්තු වේ.

විදේශ කටයුතු අමාත්‍යාංශය, වෙළඳ අමාත්‍යාංශය සහ කර්මාන්ත අමාත්‍යාංශය ඒකාබද්ධව මෙම ප්‍රතිපත්තිමය වෙනස්කම් ඉදිරියට මෙහෙයවන බව ද අමාත්‍යවරයා සඳහන් කළේය.

RCEP සමග එක්වීමට ශ්‍රී ලංකාව සූදානම් වීම සම්බන්ධයෙන් විදේශ අමාත්‍ය විජිත හේරත්ගේ මෑතක ඔස්ට්‍රේලියානු සහ නවසීලන්ත සංචාරයේ දී සාකච්ඡා කෙරුණු අතර පාත්ෆයින්ඩර් වටමේස සාකච්ඡාව සංවිධාන කර තිබුණේ එහි බලපෑම පිළිබඳවයි.

මෙම අවස්ථාවට ඉන්දුනීසියාවේ ශ්‍රී ලංකා තානාපතිනිය මෙන්ම නවසීලන්ත සහ ඔස්ට්‍රේලියානු මහකොමසාරිස්වරු ද එක්ව සිටියහ.

යෝජිත ප්‍රතිසංස්කරණවල ප්‍රධානතම අරමුණක් වන්නේ ශ්‍රී ලංකාව නැගෙනහිර ආසියානු කලාපය සමඟ සම්බන්ධ කිරීමයි.

කලාපීය ආර්ථික ගිවිසුම් හරහා ශ්‍රී ලංකාවේ ආර්ථික සබඳතාවලින් සියයට 30ක ප්‍රමාණයක් නැගෙනහිර ආසියාව වෙත යොමුකිරීමට රජය සැලසුම් කර ඇත.

විශේෂයෙන්ම දැනට යුරෝපය සහ ඇමරිකා එක්සත් ජනපදය මත පමණක් දැඩි ලෙස යැපෙන මෙරට ඇඟලුම් කර්මාන්තයට (විශේෂයෙන්ම ඉහළ පෙළේ නිමි ඇඳුම් ක්ෂේත්‍රයට), මෙමගින් නව නැගෙනහිර ආසියානු වෙළඳපොළවල් විවෘත වනු ඇත.

ඇඟලුම් ක්ෂේත්‍රයට අමතරව තවත් දේශීය කර්මාන්ත කිහිපයක් ද මෙම නව වෙළඳ ප්‍රතිපත්තිය හරහා නැගෙනහිර ආසියානු කලාපයට හඳුන්වා දීමට කටයුතු කරන බව අමාත්‍ය චතුරංග අබේසිංහ වැඩිදුරටත් ප්‍රකාශ කළේය.