දෙහිවල ජාතික සත්වෝද්‍යානයෙන් රුපියල් ලක්ෂ 5කට වඩා වටිනා නිල්-කහ මැකෝ ගිරවකු සොරකම් කිරීමෙන් පසු දෙහිවල පොලිසිය විමර්ශනයක් ආරම්භ කර ඇත.

මෙම සිදුවීම ජුනි 4 වැනි දින රාත්‍රියේ සිදුවී ඇති බවට විශ්වාස කෙරෙන අතර, අසල වෙළඳසැලක සීසීටීවී දර්ශන මගින් සත්වෝද්‍යාන පරිශ්‍රය අසල ගැවසුණු සැකකාර පුද්ගලයකු අල්ලාගත් බව වාර්තා වේ.

සත්වෝද්‍යාන නිලධාරීන්ට අනුව, කුරුල්ලා නිල්-කහ මැකෝ ගිරවුන් 30ක් අතරින් එක් පක්ෂියෙකි.

උදෑසන පරීක්ෂා කිරීමේදී සත්වෝද්‍යාන පාලකයා කූඩුවේ අගුලපරික්ෂා කිරීමේදී සොරකම අනාවරණය වී ඇත.

ඔහු වහාම ජ්‍යෙෂ්ඨ සත්වෝද්‍යාන නිලධාරීන්ට ඒ බව දැනුම්දී තිබේ.

පසුව කරන ලද පරීක්ෂාවකින් එක් කුරුල්ලකු අතුරුදහන් වී ඇති බව තහවුරු වී ඇත.

පසුව සත්වෝද්‍යාන පරිපාලනය එහි ආරක්ෂක අංශ හරහා දෙහිවල පොලිසියට විධිමත් පැමිණිල්ලක් ගොනුකර තිබේ.

මෙය එවැනි සිදුවීමක් වාර්තා වූ පළමු අවස්ථාව නොවේ. 2021 අගෝස්තු 8 වැනි දින, එම කුටියේම තවත් නිල්-කහ මැකෝ ගිරවකු අතුරුදහන් වූ බවට වාර්තා වූ අතර, පසුව රත්මලානේ නිවසකින් එම සත්වයා සොයාගන්නා ලදී.

සීසීටීවී දර්ශන සහ සත්වෝද්‍යාන වාර්තා ආධාරයෙන් පොලිසිය සිද්ධිය පිළිබඳව විමර්ශනය කරයි.