2025 මාර්තු සහ 2026 සැප්තැම්බර් අතර කාලය තුළ හම්බන්තොට වරාය හරහා වාහන 167,569ක් ප්‍රතිනැව්ගත කිරීම සහ හැසිරවීම සිදු කර ඇති බව හම්බන්තොට ජාත්‍යන්තර වරාය සමූහය නිවේදනය කරයි.

ඒ අනුව, 2025 මාර්තු සහ දෙසැම්බර් අතර කාලය තුළ අලුත් වාහන 30,809ක් සහ භාවිත කරන ලද වාහන 55,580ක් ඇතුළුව වාහන 86,389ක් හසුරවා ඇත.

තවද, 2026 සැප්තැම්බර් දක්වා කාලය තුළ අලුත් වාහන 25,018ක් සහ භාවිත කරන ලද වාහන 56,162කින් සමන්විත තවත් වාහන 81,180ක් හැසිරවීමට කටයුතු කර තිබේ.

වාහන සඳහා පවතින ඉල්ලුම ඉහළ යාම සහ වාහන ප්‍රවාහනයට බලපා ඇති විවිධ සැපයුම් බාධක මධ්‍යයේ, ආනයනකරුවන්ට අවශ්‍ය සහය ලබා දීමට පියවර ගෙන ඇති බව හම්බන්තොට ජාත්‍යන්තර වරාය සමූහය සඳහන් කරයි.

මේ අතර, ශ්‍රී ලංකා වාහන ආනයනකරුවන්ගේ සංගමය විසින් හම්බන්තොට ජාත්‍යන්තර වරාය සමූහයේ ප්‍රතිචාර දැක්වීම්වල වේගවත් බව, මෙහෙයුම් නම්‍යශීලීභාවය සහ ප්‍රායෝගික සහයෝගය අගය කර ඇත.

සාමාජිකයන් 450කට අධික සංඛ්‍යාවක් නියෝජනය කරන මෙම සංගමයට මහා පරිමාණ ව්‍යවසායන් මෙන්ම ක්ෂුද්‍ර, කුඩා සහ මධ්‍ය පරිමාණ වාහන ආනයනකරුවෝ ද ඇතුළත් වෙති.

වාහන ආනයන සීමා පැනවී තිබූ කාල සීමාව තුළ, වරාය තුළ දිගු කාලයක් රඳවා තබා ගන්නා ලද වාහන සඳහා ප්‍රමාද ගාස්තු නිදහස් කිරීම් සහ වෙනත් සහන ද හම්බන්තොට ජාත්‍යන්තර වරාය සමූහය විසින් හඳුන්වා දෙන ලදී.

හම්බන්තොට ජාත්‍යන්තර වරාය සමූහය විසින් නිකුත් කරන ලද නිවේදනයකට අනුව, වාහන නිදහස් කර ගැනීම පහසු කිරීමට සහ ආනයනකරුවන්ට සිදුවන මූල්‍යමය බලපෑම අවම කිරීමට මෙම පියවර ගන්නා ලදී. තවද, පර්සියානු ගල්ෆ් කලාපය හරහා වන වාහන අප්‍රේරණ මාර්ගවලට ඇති වූ බාධා හේතුවෙන් බලපෑමට ලක් වූ වාහන සඳහා ගබඩා ගාස්තු සීමා කිරීමේ ක්‍රමවේදයක් ද මෑතකදී හඳුන්වා දී තිබේ.

හම්බන්තොට ජාත්‍යන්තර වරාය සමූහයේ ප්‍රධාන විධායක නිලධාරී විල්සන් ක්යු ප්‍රකාශ කළේ, ඉහළ යන ඉල්ලුමට ප්‍රතිචාර දැක්වීම සඳහා ප්‍රමාණවත් වරාය හැසිරවීමේ ධාරිතාව පමණක් නොව, පාරිභෝගිකයන්ගේ මෙහෙයුම් අවශ්‍යතා අවබෝධ කර ගැනීම සහ වෙනස් වන තත්වයන්ට අනුවර්තනය වීමේ හැකියාවද අත්‍යවශ්‍ය වන බවයි.