දූෂණ චෝදනා සම්බන්ධයෙන් දැනට වසර 16ක සිරදඬුවමක් විඳිමින් සිටින උතුරුමැද පළාත් හිටපු ප්‍රධාන අමාත්‍ය එස්.එම්. රංජිත් සහ ඔහුගේ නෑණා වන ශාන්ති චන්ද්‍රසේකර විසින් ගොනුකර ඇති ඇප අයැදුම්පතක් සලකා බැලීම සඳහා කොළඹ මහාධිකරණය සැප්තැම්බර් 9 වැනිදාට දින නියම කර තිබේ.

2012 සැප්තැම්බර් 27 සිට 2014 දෙසැම්බර් 31 දක්වා කාලය තුළ එස්.එම්. රංජිත් උතුරුමැද මහඇමතිවරයා ලෙස කටයුතු කළ සමයේ රාජ්‍ය මුදල් අවභාවිත කිරීම සම්බන්ධයෙන් අල්ලස් පනත යටතේ මොවුන් දෙදෙනා වරදකරුවන් වී සිටියි.

ඔහුගේ පෞද්ගලික ලේකම්වරිය ලෙස කටයුතු කළ ශාන්ති චන්ද්‍රසේකරට ඉන්ධන දීමනා සහ වැටුප් ලබාගැනීම හා නීතිවිරෝධී ලෙස ඉන්ධන ඇණවුම් කිරීමට සහාය වන ලෙස රජයේ නිලධාරීන්ට බලකිරීම හරහා රුපියල් මිලියන 2.6 කට අධික මුදලක් සාවද්‍ය ලෙස පරිහරණය කළ බවට චෝදනා එල්ල වි තිබිණි.

දීර්ඝ නඩු විභාගයකින් අනතුරුව, චෝදනා සාධාරණ සැකයෙන් ඔබ්බට ඔප්පු වී ඇති බවට මහාධිකරණය අප්‍රේල් 2 වැනිදා තීන්දු කළ අතර, එම දෙදෙනාටම වසර 16ක සිරදඬුවමක් නියම කෙරිණි.

මෙම ඇප අයැදුම ඉදිරිපත් කර ඇත්තේ චූදිතයන් වරදකරු කිරීම අභියෝගයට ලක්කරමින් අභියාචනාධිකරණයට ගොනුකළ අභියාචනයක කොටසක් වශයෙනි.

අභියාචනයේ ප්‍රතිඵලය ලැබෙන තෙක් විත්තිකරුවන් ඇප මත මුදාහැරිය යුතු බව විත්ති පාර්ශ්වය තර්ක කරයි.